[A:98a]tshogs 'khor gyi ming btags nas bag med du longs spyad par mi bya zhes pa'i don yin la/ yang rab byung gis tshogs 'khor gyi tshe sha chang gtan nas bsten mi rung ba'ang gsang ba kun rgyan gyi dgongs pa ma yin te/ ting nge 'dzin la brtan pa thob pa'i sdom brtson rnams kyis tshogs 'khor gyi tshe sha chang sogs khyim pa rdor 'dzin rnams dang khyad med du longs spyad kyang dran shes nyams pa sogs kyi nyes par mi 'gyur yang / gzhan ma dad pa sogs kyi rgyur song dogs nas cung zad tsam longs spyod cing / de min pa'i sdom brtson rnams kyis ni dam rdzas ma bsten pa'i nyes pa spang ba'i phyir sha chang sogs cung zad bsten par gsungs shing / mang du bsten par ma gsungs pa'i phyir/ gal te 'dul ba dang bstun na cung zad tsam re'ang bsten du mi rung / tshogs 'khor gyi tshe tshim par longs spyod ces gsungs pas de dang 'gal lo snyam na/ lha mchod pa'i bsam pas cung zad re bsten pas bcas 'gal gyi nyes pa'ang mi 'byung / dam rdzas ma bsten pa'i nyes par yang mi 'gyur bar rje btsun khu dbon gyis/ sdom brtson rnams la cung zad tsam/ /zhes dang / bag tsam zhes dang / bdud rtsi myang ba tsam zhes dang / rab tu byung ba la tshogs kyi 'khor lo la sogs pa dgos pa rgya chen po mthong ba'i tshe ni phyi dro'i kha zas kyi nyes pa med la zhes sogs kyi dmigs bsal gsungs pa yin cing / tshim par longs spyod ces pa'ang rang nyid lhar gsal ba lus dkyil gyi lha dang bcas pa thams cad mnyes shing tshim par bsam pa'i don yin