[A:102b]'khor byed pa phal cher rim gnyis kyi ting nge 'dzin la brtan pa ma thob pa shas che ba'i phyir/ 'di la dgongs nas rje btsun sa paN dang kho bo cag gi yongs 'dzin gong ma rnams kyis tshogs 'khor lugs gnyis gsungs pa yid ches pa'i gnas su gyis shig ting nge 'dzin la brtan pa thob pa'i tshogs 'khor la dgag bsgrub mi dgos te/ de dag gi mdzad pa thams cad sa lam gyi grogs kho nar 'gyur ba'i phyir zhes bshad la/ yang grub pa'i dga' ston las gal te sa paN gyis klu sgrub yab sras/ thogs med sku mched/ jo bo rje dang / kho bo'i mkhan po bsod snyoms pa chen po la sogs pa rnams kyis tshogs kyi 'khor lo'i lugs 'di yin no/ /sdom brtson rnams dbang bskur ba la sogs pa'i dus su 'di ltar byas na legs so zhes gsungs pas 'grub snyam na/ jo bo dang mkhan po sogs kyis bod rnams snod min du dogs nas mdzad pa yin gyi/ de rang lugs su ma nges zhes pa'i lan du/ rje bsod nams rab brtan gyis 'di'ang 'brel med bzhad gad kyi gnas te jo bo dang mkhan pos de ltar yin zer na'ang / klu sgrub dang thogs med sogs kyis bod rnams snod min du dogs nas rgya gar du de ltar mdzad ces pa la 'brel med pas so/ /gzhan yang jo bo sogs kyis bod rnams snod min du dogs nas tshogs 'khor de ltar mdzad pa la/ khyed kyis bod rnams snod ldan du dgongs nas sha chang gtso bor bsten pa'i tshogs 'khor byed pa 'gal lo/ /gal te sa paN gyis sdom brtson gyi lugs bshad pa de brtan pa ma thob pa'i dbang du byas pa yin na klu sgrub sogs der