[A:103b]pa'o zhes kho bo cag smra'o zhes sogs gsungs pa'i rjes su/ mdor na tshogs 'khor gyi rnam gzhag grub pa'i dga' ston las dgag pa'i ngal ba mang du gsungs ba de thams cad tshig zin tsam la/ bdag cag rnams kyi 'dren pa kun dga'i mtshan can gyis gnang ba'i tshogs 'khor gyi rnam gzhag gsang ba kun rgyan dang / kun bzang rnam rol gnyis la dgag pa brjod nas/ don la rje btsun sa paN gyis tshogs 'khor rnam gzhag tu rab byung sdom brtson gyi lugs gsungs pa de bkag par snang ste/ de'ang yid ches pa'i phyir du sa paN gyi gsung bkod pa na ི zhes gsungs nas/ chos rje'i tshogs 'khor las sdom brtson gyi lugs gsungs pa de 'dren par mdzad do/ de dag ni ngor rdzong lugs gnyis kyi bzhed pa rags pa tsam bkod pa yin pas skal bzang rnam dpyod dang ldan pa dag gis rje btsun khu dbon gnyis kyi tshogs 'khor gyi rnam gzhag dang / rje rdo rje 'chang kun dga' bzang pos mdzad pa'i tshogs 'khor gyi rnam gzhag ston pa'i gsung rab gnyis/ rdo rje gdan pa chen po'i tshogs 'khor gyi rnam bshad grub pa'i dga' ston/ rje bsod nams rab brtan gyis mdzad pa'i tshogs 'khor gyi rtsod spong log rtog gi brag ri 'joms pa'i rdo rje zhes bya ba rnams la yang nas yang du lta rtog gyis la legs bshad kyi dga' ston slar yang spel bar mdzad du gsol/
de ltar grub pa'i dga' ston dang / de nyid kyi rtsod spong log rtog gi brag ri 'joms pa'i rdo rje gnyis kyi rtsod pa dang rtsod lan rnams kyi don so so la dpyad rgyu 'ga' re snang yang yi ges 'jigs nas 'dir ma bris