[A:104a]la/ gzhan phal cher gsung rab kyi don la zhugs shing dgag bsgrub kyi sgo nas blang dor gyi gnad phyin ci ma log par ston pa'i legs bshad bla na ma mchis par snang mod/ 'on kyang grub pa'i dga' ston du/ de bas rje btsun rin po che grags pa rgyal mtshan zhabs yang dag pa'i dge ba'i bshes gnyen du byed na smra ngan 'di'i 'gro ba cir 'gyur zhes sogs dang / rje rdo rje 'chang kun dga' bzang po la rtsa ba'i ltung ba bcu bzhi po thams cad byung ba dang / de la brten nas ngan song du skye bar 'gyur tshul gsungs pa rnams ni ha cang rtsub mo'i gsung du snang bas/ rje btsun rdo rje gdan pa chen po rang nyid bslab pa dang dbang las rnam par grol nas nyes par mi 'gyur ba zhig yin na'ang / rjes 'jug mi shes pa dag gis 'di tsam gyi gsung la brten nas skyes bu dam pa la log lta dang skur 'debs kyis sdig gsog gi rgyur song dogs pa dang / de bzhin du rje bsod nams rab brtan gyis rdo rje gdan pa'i gsung de'i lan du/ de ltar smra ba po rang nyid la nyan thos kyi bslab pa la ltos na dge 'dun lhag ma'i ltung ba dang / rdo rje theg pa la ltos na rtsa ltung bzhi pa 'byung bar gsal te zhes sogs gsungs pa'ang 'jig rten ngan pa'i kha skad ltar du snang bas/ rang re rjes 'jug so skye rnams kyis grub mtha'i rnam gzhag la bzhed pa 'thad mi 'thad kyi lung rigs kyi dpyad pa mdzad pa ni/ bstan pa la phan pa'i yan lag tu 'gyur zhing / de las gzhan skyes bu dam pa la ngan smra dang sgro skur sogs kyi grub mtha'i bstan pa 'dzin mi nus pas mkhas pas spang bar bya