[A:11b]rje 'chang gis bstan pa'i rgyun la dgongs pa'i thugs kyi lhag bsam 'di la rang gzhan kun gyis rjes su yi rang dang gus pa'i thal mo snying nas sbyor rigs te/ de'i rgyun mtshan gyis rje btsun sa skya pa'i gdung brgyud gong ma phal cher yang phyag len gtso bor de bzhin du mdzad pa'i dgongs bzhed kyang de yin no/ /mkhan chen bzang bkras pas yi ge de rje btsun gyi gsung min pa'i shes byed du/ mkhan chen shes rdor bas gsan pa'i rje btsun gyi bka' 'bum gyi nang na med pa bkod kyang / ngor lugs la'ang yi ge de la lung rgyun med par bzhed pas shes byed rnam dag tu 'gro ba dka' zhing / sgyi chu ba buddha shrI'i de ltar na byang sdom gyi sngon du so thar dgos pas skabs der gsol bzhi'i cho gas bsnyen rdzogs zhig kyang byed rigs zhes dbang gi sngon du byang sdom dang / de'i sngon du so thar dgos pa tsam la dgongs nas byang sdom dang bsnyen rdzogs kyi sdom pa gnyis mtshungs pa bsgre bar mdzad kyang de gnyis mi mtshungs te/ byang chub tu sems bskyed pa sngon du ma song bar dkyil 'khor du 'jug tu mi rung ba ni/ rigs dang dam tshig ma thob snying rje med/ /de bzhin byang chub sems kyang ma bskyed cing / /sangs rgyas ma dad lha gzhan bsten pa la/ /nga yi gsang sngags bstan na phung bar 'gyur/ /zhes pa la sogs pa rgyud sde phal cher las gsungs shing / byang sdom gyi rten du so thar gyi sdom pa tsam dgos kyang / bsnyen rdzogs kyi sdom pa nges par dgos pa'i bshad tshod mi snang bas so/ /gnyis pa rjes bzung la grangs nges yod med kyi rnam gzhag ni/ ngor lugs la lam