[A:14b]dgos/ de byas na ni snang gsum gyi khrid tshar gnyis zlos pa can du 'bogs dgos par 'gyur ro zhes gsungs/ yang gong gi mus srad pa chen po'i gsung de'i lan du thams cad mkhyen pa dkon mchog lhun grub kyis tshangs pa'i rigs sngags su rjes 'dzin gyi rnam gzhag spyir bstan pa dang / skabs don gyi dngos lan 'phros dang bcas pa gnyis su mdzad/ dang po la spyi rgyud kyi rjes 'dzin gyi rnam gzhag dang / lam 'bras pa'i rjes 'dzin bshad pa/ gnyis ka ltar yang rgol ba la 'gal ba ste gsum du mdzad nas shin tu rgyas par 'byung ba rnams cung zad bsdus te bkod na/ dang po la spyi rgyud las/ las kun byed pa'i gsang sngags kyi/ de las slob ma yongs su bzung / /bu mo gzhon nus bkal ba'i skud/ /blangs nas bzhi bcu rtsa dgur bzlas/ /slob ma rnams ni blos bsam nas/ /mnyam par bzhag pas mdud pa bor/ /de ltar slob ma yongs bzung nas/ /las la bgegs ni med par 'gyur/ /zhes pas slob ma rjes bzung dngos dang / sang ni dkyil 'khor bri ba yi/ /zhes sogs kyis sta gon gyi sbyor ba dang lha sta gon sogs/ de nas slob ma legs brtags te/ /zhes sogs kyis slob ma'i mtshan nyid dang kun slong gi bsam pa/ mkhas pas slob ma gcig gam gsum/ /zhes pa nas/ sta gon gnas par brtsam par bya/ /zhes pa'i bar gyis slob ma'i grangs dang lus kyi spyod lam/ dang po gsum la skyabs su btang / /zhes sogs kyis slob ma sta gon gyi cho ga dngos bstan pa yin no gsungs/ gnyis pa la dbang chu las dbang bskur don du