[A:25a]zhes gsungs la/ de ltar mkhas pa'i bzhed srol rnam grangs mang po zhig bshad pa de dag la rang gis go tshod kyis rnam dbye cung zad phye na/ mkhas mchog rdo rje rgyal mtshan gyis dbang gi sta gon dang dngos gzhi'i slob ma la grangs nges yod na slob ma rjes 'dzin la yang grangs nges dgos gsung pa 'di spyir btang la rgyud sde'i dgongs par gnas te/ spyi rgyud las/ mkhas pas slob ma gcig gam gsum/ /lnga 'am yang na bdun dag gam/ /nyi shu rtsa ni lnga yi bar/ /zung du ma gyur slob ma bzung / /de bas lhag pa'i slob ma ni/ /yongs su bzung ba mi shes so/ /zhes gsungs pa dang / dbang chu chen mor/ de ltar 'brel pa brtags nas mtshan nyid dang ldan pa'i slob ma gcig nas nyi shu rtsa lnga'i bar grangs kha yar ba gzung bar bya'i/ de bas lhag pa dkyil 'khor gcig tu gzung bar mi bya ste zhes gsungs nas/ spyi rgyud kyi lung de 'dren par mdzad pa dang / khyad par chos rje sa skya paNTi ta chen po'i sdom gsum rab dbyer/ sngags kyi dbang bskur byed pa na/ /grangs nges med par dbang bskur byed/ /'di ni rdo rje 'chang gis bkag /spyod pa'i rgyud kyi dbang skur la/ /slob ma grangs nges med par gsungs/ /lhag ma dmigs bsal mdzad pa yi/ /slob ma la ni grangs nges yod/ /ces spyod rgyud kyi dbang la grangs nges med pa dmigs bsal dang / lhag ma rgyud sde gzhan gsum gyi dbang la grangs nges yod pas/ grangs nges med par dbang bskur byed pa bkag pa'i shes byed du/ mkhas pas slob ma gcig gam