[A:30b]rgyud sde gong ma rnams su rang rang na gsal kha yod pa rnams de kha gtso ba dang / ci ste gong mar dbang gi gnas skabs sogs su gsal kha cher med pa na 'og ma nas blang chog pa dang / len dgos par ston pa nyid kyis gsungs pa dag sbyar ba yin gyi/ rgyal bas ma gsungs pa zhig rang bzo mdzad nas lung sbyor du bshad pa min pa'i phyir/ 'o na ston pas bla med sogs kyi dbang gi slob ma'i grangs nges bya rgyud las len par gang du bshad snyam na/ dogs pa 'di lta bu sngon gyi dus su'ang byung zhing / ma 'ongs pa na khyod lta bu 'byung bar chos kyi rje'i ye shes kyi gzigs pas legs par mkhyen nas sdom gsum rab dbye las bla med sogs kyi dbang gi slob ma nyer lnga las lhag pa mi rung ba spyi rgyud kyi lung dang sbyar ba'i rjes su/ 'di ni bya ba'i rgyud yin pas/ /gzhan gyi cho ga min snyam na/ /gzhan rnams kun la 'di 'jug pa/ /spyi rgyud nyid las 'di skad gsungs/ /zhes bka' stsal bar snang zhing / des na ston pas/ gang du las ni yod gyur la/ /las kyi cho ga rnams med pa/ /de ni spyi yi rgyud dag las/ /gsungs pa'i cho ga mkhas pas bsten/ /zhes spyi rgyud du gsungs pa 'dis rgyud sde gang du dbang bskur ba la sogs pa'i las ni yod la/ slob ma'i grangs sogs las kyi cho ga gsal po med pa rnams spyi rgyud 'di nas bshad pa ltar bya'o zhes bstan pas/ chos rje sa paN gyis lung sbyor de ltar mdzad pa 'di ni rdo rje 'chang gi rgyud kyi dgongs pa bla na med pa yin la/ khyed kyis bya rgyud las dus 'khor btsan pas de ltar mi rigs zhes pa ni rdo rje 'chang la rgol