[A:31b]sdom pa de nyams te/ /brtul zhugs can de pham pa yi/ /ltung ba dag ni 'byung 'gyur zhing / /zhes pas rigs ldan la ltung ba phog par 'gyur ro/ /der snod dang ldan pa mang po la bskur ba yongs su gsungs pas lung gi go mi chod na zhes sogs gsungs 'dug kyang / de ltar bshad pa ni de dus kyi dbang bskur mkhan dang dbang zhu mkhan thams cad skal ldan las dag pa'i gang zag kho na yin pas/ rdo rje slob dpon 'phags pa'i gang zag gis mdzad pa'i sngon gyi cho ga yin gyi/ deng sang gi so so skye bos byar mi rung la/ yang khyed kyi yang lan de nyid las/ 'phags pas mdzad pa ji lta ba slob ma la bya dgos pa rdo rje gur du/ byang chub rdo rje sangs rgyas la/ /mchod cing ji ltar stsal ba ltar/ /bdag kyang rab tu bskyab pa'i phyir/ /nam mkha'i rdo rje deng bdag stsol/ /ces pa dang / slob dpon padma manydzus/ dpal ldan bde ba'i mgon po yis/ /dpal ldan chos kyi rdo rje la/ /gsang ba'i de nyid bstan pa ltar/ /mgon po de bzhin bka' drin stsol/ /zhes gsungs so/ zhes bshad 'dug pas sngon byung ba'i rgyu mtshan gyis da lta'i rjes 'jug gis byar rung zhing bya dgos par yang 'dod na/ sngon grub chen te lo pas nA ro pa la 'jim ril zhig 'phangs pa dang / rnam thar 'ga' zhig las mchil lham 'phangs par bshad de gang ltar de la brten nas nA ro pa'i thugs la mi rtog pa 'khrungs pa dang / nA ro pas dpal mchog Dombhi par bdud rtsi byin rlabs byas pa'i thod chang byin pa 'thungs pa tsam gyis grol ba'i tshul bshad yong gi 'dug pa khyed dag de bzhin du gyis la slob ma