[A:32b]rgyud sde rnams las lan gcig ma yin par yang nas yang du gsungs shing / de'ang dbang bskur rdo rje theg pa'i lam gyi rtsa ba yin pa'i rgyu mtshan kyis yin par/ sdom gsum rab dbye las/ des na thub pas rgyud sde las/ /dbang bskur kho na bsngags pa dang / /mkhas rnams spyi nas dbang bskur la/ /gus pa'i rgyu mtshan de ltar yin/ /zhes gsungs pas bstan la/ khyed rang gis yang lan der/ lar dbang ma thob par mchog thob pa med la zhes bshad pas dbang ma thob par mchog thob pa med pa nyid kyang bzhed cing / rjes gnang ma thob na mchog mi 'grub par bshad pa tshad ldan gyi lung gang na'ang med pa'i phyir/ gal te bya rgyud kyi dbang dang rjes gnang la khyad par med zer rgyu yin na/ ye shes thig le'i rgyud las/ chu yi dbang bskur cod pan dag /bya ba'i rgyud la rab tu grags/ /zhes pa'i dbang de dag gang du bskur ba'i dkyil 'khor ston pa'i rgya gzhung yang snang na/ rjes gnang la de 'dra gang du bshad/ des na 'di ni bya rgyud la 'dris med do zhes pa'i gsung du snang ngo / /yang dri ba der/ rigs pa cho ga rdzogs par mi 'gyur lo/ /dus 'khor 'phreng ba'i dbang nyid mang po la/ /brten bzhin de skad smras kyang mdzes pa min/ /bde kye nyung ba mngon sum nyid kyis grub/ /ces pa 'di'ang rab dbyer/ de bas lhag pa'i slob ma la/ /cho ga yongs su rdzogs pa ni/ /mtshan mo gcig la tshar mi nus/ /de yi mtshan mo ma tshar na/ /cho ga nyams par 'gyur bar gsungs/ /zhes sogs la rgol rgyur 'dug na'ang / bdag nyid chen pos de ltar gsungs