[A:34b]gzhung bshad las bshad pa skabs 'di'i snang gsum gyi sngon du dbang dgos pa'i shes byed du 'dod pa ni rdo rje'i tshig rkang gi bzhugs tshul rags pa tsam yang thos bsam gyi yul du ma byas pa'i 'chal gtam yin te/ gzhung de'i bzhugs tshul la snang ba gsum lam rang rkang la sbyar ba dang / lam gyi gzhi bca' la sbyar ba gnyis las/ dang po ni gzhung de'i 'khor 'das thun mong ba'i gzhung tshom bu re res kyang 'tshang rgya ba'i cha rkyen lam 'bras bu dang bcas pa yongs rdzogs re ston pa yin la/ de'i tshe snang ba gsum du bstan pa'i gzhung nyung ngu des kyang snang ba gsum lam rang rkang la sbyar ba zhes pa'i ming can gyi lam 'bras bu dang bcas pa'i gdams ngag yongs rdzogs gcig ston dgos pas/ de la dgongs nas gzhung bshad rnams su thos bsam dang bslab pas rgyud sbyangs pa dang / dbang gis sbyangs pa sogs kyi rnam gzhag de dag 'byung ba yin la/ snang gsum lam gyi gzhi bca' la sbyar ba'i skabs 'dir ni 'khor 'das thun mong ba'i gzhung tshom bu bdun dang / 'khor lo 'cham pa 'jig rten pa'i lam gyi gzhung tshom bu bdun te bcu bzhi po thams cad kyang gang zag gcig gis nyams su blang bya'i lam 'bras bu dang bcas pa'i gdams ngag yongs rdzogs zhig ston pa la dgongs nas/ rje sa chen gyis/ snang ba gsum gyis lam gyi gzhi bcas te/ nyams blangs ma lus rgyud gsum dag gis shes/ /zhes sogs gsungs/ de'i tshe snang gsum lam gyi gzhi bca' la sbyar ba'i lam ni rgyud gsum po nyid la 'jog de'ang smin grol gnyis su