[A:39a]yang / /sems bskyed khyad chos byed dgos pas/ /rje btsun rnams la rgol ba'i phyir/ /de la bdag gis ci zhig bya/ /zhes gsungs so/ /de dag las/ rje btsun mthu stobs dbang phyug gis/ /zhes pa nas/ nges par dgos par gsungs pa nyid/ /ces pa'i bar gyis ni gong gi dri ba de'i dngos lan btab pa ste/ de'ang rnal 'byor dbang phyug gi gzhung rdo rje'i tshig rkang gi brjod don nyams su len tshul 'jam dbyangs drug pa bla ma dam pa'i khrid yig ltar snang gsum gyi sngon du dbang nges par bskur nas bkri ba'i khrid rim 'di gtso bor skal ldan cig car ba'i lam rim yin cing / skal dman rim 'jug pa yod kyang / /de la'ang snang gsum thog mar dbang bskur dgos par ljon shing dang / dag ldan/ dbang chu chen mo/ gang zag dbang po rab 'bring gsum du bkri ba'i gzhung shing rnams las bshad ces pa'i don du snang la/ de nas/ khyed rnams rgyu dus dbang gi sngon/ /zhes pa nas/ dkar chag tu gsungs ji ltar bgrang / /zhes pa'i bar ni ngor lugs la phar 'dri ba ste/ /de'ang rgyu dbang gi sngon du snang gsum nges par dgos zer ba de snang gsum sngon du ma song bar dbang bskur mi rung ba yin nam/ dbang bskur zin pa la snang gsum ston mi rung ba gang yin/ dang po ltar na dbang logs su byed pa med par 'gyur/ phyi ma ltar na lam 'bras tshar gnyis 'chad pa'i tshe ji ltar byed/ khyad par rgyud gsum gyis bkri ba'i skabs su/ rgyu chos can 'khor ba'i gnas tshul zhes sogs slar yang ma dag snang