[A:4a] /de las rdzong lugs kyi bstan 'dzin gyi gtso bo ni nyi lde ba kun dga' rgyal mtshan nam mtshan gzhan 'jam dbyangs grags pa'i dpal zhes pa de nyid dang / brang mo che pa rdo rje rgyal mtshan/ rdo rje gdan pa kun dga' rnam rgyal sogs mang du byon zhing / ngor lugs kyi bstan 'dzin gyi gtso bo ni rgyal bas lung bstan pa'i skyes bu chen po rdo rje 'chang kun dga' bzang po/ sems dpa' chen po dkon mchog rgyal mtshan/ kun mkhyen bsod nams seng ge paN chen shAkya mchog ldan/ mkhan chen bsod nams lhun grub/ mkhas pa'i dbang po dkon mchog lhun grub la sogs pa grangs dang tshad med pa zhig byon pa las/ de ltar lugs gnyis kyi mkhas pa de dag don dam lta ba'i gnad la bzhed tshul mi 'dra ba'i khyad par cung zad kyang med mod/ 'on kyang kun rdzob cho ga'i rnam gzhag sogs la phyag len mi mthun pa 'ga' re byung ba'i dbang gis dgag sgrub kyi rnam par gzhag pa'ang ci rigs pa snang te/ de'ang gtsang byams pa rdo rje rgyal mtshan gyis chu rgyun rnam pa bzhi dang / sgrub pa bzhi la sogs pa gsung rab kyi tshogs mang po zhig mdzad pa las rnam par bshad pa'i chu rgyun dang po ni/ bo gdong paN chen sogs gzhan lugs kyi mkhas pa 'ga' zhig gis rje btsun gong ma'i gsung la brgal brtags kyi rnam grangs mang po zhig gsungs pa dag lung rigs kyi sgo nas sun phyung ste chos dang mthun pa'i lan med par mdzad cing / gong ma'i dgongs don phyin ci ma log par sgrub pa'i legs bshad kyi dga' ston du snang ste skabs drug gi bdag nyid can no/ /chu