[A:44b]gnyis gang yin gyi gsal kha ma phye bar lam 'bras tshar gnyis 'chad pa'i tshe gnyis pa de rtsod gzhir bzung nas mgo mtshungs kyi lan mdzad pas ni rdzong pa rang da lta phyag len mdzad pa'i lam 'bras kyi khrid tshul 'di skal ldan cig car ba dang / skal dman rim 'jug pa'i lam gnyis kyi bkri tshul gang yang min gsungs pa 'dra ba zhig 'dug pa de ltar bzhed na/ rtsa ba'i rgyud brtag pa gnyis pa las/ skal dman sems can 'dul dka' ba/ /gang gis 'dul bar 'gyur ba lags/ /zhes pa'i lan du/ dang por gso sbyong sbyin par bya/ /zhes pa nas/ de rjes kyai rdo rje bstan/ zhes pa'i bar gsungs pa 'dis skal dman rim 'jug pa'i lam rim dang / de'i shugs la/ skal ldan sems can 'dul sla ba/ /gang gis 'dul bar 'gyur ba lags/ /zhes pa'i zhu ba dang / de'i lan du/ dang por kyai rdo rje bstan/ /zhes pa don gyis thob par bshad pa des skal ldan cig car ba'i lam rim bstan pa de mi 'thad par 'gyur zhing / de ltar bdag med mas gdul bya la skal dman rim 'jug pa dang skal ldan cig car ba gnyis su phye nas de gnyis 'dul thabs zhus pa dang / bcom ldan 'das kyis de gnyis 'dul tshul gsungs pa'ang 'brel med du bzhed dgos par 'gyur ro/ de bzhin du chos rje byang chub dbang rgyal gyis kyang mgo mtshungs kyi lan mang du mdzad mod/ spyir mgo mtshungs kyi lan gtan nas mi rung ba ma yin kyang / mgo mtshungs mi mtshungs brtags nas bya dgos te/ ma brtags par gya tshom du bkod na mgo sgre mi nus pa mang du 'byung bas so/ /de'ang