[A:46b]gnyis gang yin la khyad par med de/ ji skad bshad pa'i khrid rim de zhus lan gsal ba der bshad pa'i lam gyi go rim dang mthun pas rje btsun gyi dgongs par snang bas so/ /de ltar yang zhus lan de nyid las/ pha rol phyin pa'i lam gyi rim pa bshad zin pa'i 'og tu/ de tsam gyis kyang blo gros ma khengs pa'i/ /blo can sbyangs pa zab mo dag la mos/ /rdo rje 'chang dbang myur du sgrub 'dod pa/ /de la rdo rje theg pa sbyin par bya/ /zhes gsungs pa yin no/ /de ltar lugs gnyis po de'i dgongs pa len lugs 'di lta bu zhig shes na ngor rdzong gnyis po ha cang mi mthun pa rgyab 'gal du song 'dug snyam pa'i blos dus 'da' mi dgos par 'gal med kyi gnad zab mo rtogs par 'gyur ro/ /rgyu mtshan des na rdzong lugs kyi mi shes pa dag gis ngor pa'i lugs 'di rje btsun gong ma'i gsung dang mi mthun no zhes skur ba 'debs pa dang / ngor lugs kyi mi mkhas pa dag gis kyang rje btsun gong ma'i bzhed pa ngor pa'i 'di kho na yin gyi rdzong pa'i lugs de sa lugs dang gtan nas mi mthun no zhes zer ba dag yod kyang / de dag ni chos spong ba'i las su 'gro bas blo gros dang ldan pa dag gis bya ba ma yin te/ lugs de gnyis kar 'thad ldan yin par shes ldan gzu bor gnas pa'i mkhas pa dag gis mgrin gcig tu gsungs pas so/ /de ltar yang mkhas pa'i dbang po dkon mchog lhun grub kyi gsung ngag bshad thabs kyi man ngag gsang ba sgo 'byed las 'phros pa'i dri lan zab don snying po las/ rje btsun rdo rje 'chang chen po'i drung gi gsang ba sgo 'byed du nyams myong ma skyes