[A:༡༠༣]གཅིག་གཉིས་སླར་ལྡབ་པ་དང་བཅས་པའི་ཉི་ཤུའི་བར་དུ་དབུས་གཙང་ཆོས་ཀྱི་ཆོལ་ཁ། མདོ་སྟོད་མིའི་ཆོལ་ཁ། མདོ་སྨད་རྟའི་ཆོལ་ཁ་སྟེ། བོད་ཆེན་པོའི་ཆོལ་ཁ་གསུམ་གྱི་རྒྱལ་ཁམས་ཀུན་ལ་མངའ་སྒྱུར་ཅིང་། ཁྱད་པར་ལ་སྟོད་ལྷོ་བྱང་། གུར་མོ། ཆུ་མིག། ཤངས་དང་། ཞ་ལུ་སྟེ་གཙང་ཁྲི་དྲུག། རྒྱ་མ། འབྲི་གུང་། ཚལ་པ། ཐང་པོ་ཆེ་པ། ཕག་གྲུ། གཡའ་བཟང་སྟེ་དབུས་ཁྲི་དྲུག་དབུས་གཙང་གི་མཚམས་སུ་ཡར་འབྲོག་ཁྲི་བསྐོར་གཅིག་སྟེ་བོད་ཁྲི་བསྐོར་བཅུ་གསུམ་གྱི་ཉེས་ལ་ཆད་པ་དང་བཟང་ལ་བྱ་དགའ་སྟེར་བ་སོགས་ཁྲིམས་ཀྱི་བྱེད་པོ་ནི། སྔར་སྨོས་པའི་དཔོན་ཆེན་ཤཱཀྱ་བཟང་པོ་དང་། ཀུན་དགའ་བཟང་པོ་གཉིས་ཀྱི་རྗེས་སུ་ཞང་བཙུན་དང་བན་དཀར་བ་གཉིས་ཀྱིས་ལས་ཀ་བཟུང་། དེ་རྗེས་བྱང་རིན་བསྐོས་པ་སོ་ཐིན་སིའི་དམ་ཁ་དང་། ཤེལ་དམ་བྱུང་ཡང་ཤངས་ཀྱི་སྡོང་མོ་ཐང་དུ་གཡོག་གིས་བསད་། དེ་རྗེས་ཀུན་གཞོན་དང་གཞོན་དབང་གཉིས་ཀྱི་རིང་ལ་དབུས་གཙང་གི་ཆེ་གསལ་ཆེན་མོ་དང་ཁྲིམས་ཀྱི་ཞིབ་ཆ་བྱས། དེ་རྗེས་དཔོན་ཆེན་བྱང་རྡོར། དེ་ནས་ཨང་ལེན། འདིས་ས་སྐྱའི་ལྕགས་རི་ཕྱི་མ་དང་། བོན་པོ་རིའི་ལྕགས་རི། ཁང་གསར་གླིང་རྣམས་བརྩིགས་ཤིང་། ས་འབྲི་ནང་འཁྲུགས་པས། ཨང་ལེན་གྱིས་ཁྲི་བསྐོར་བཅུ་གསུམ་གྱི་དམག་འབྲི་གུང་དུ་དྲངས་ཏེ། ལྷ་ཁང་མེ་ལ་བསྲེགས་པ་སོགས་འབྲི་གུང་གླིང་ལོག་ཏུ་གྲགས་པ་དེ་བྱས་ཤིང་། དྭགས་པོ་སོགས་སུ་དཔུང་ཁྱེར་བྱས་པའི་ས་མཚམས་ཀྱི་བྲག་ལ་ཨང་ལེན་གྱི་མིང་བྲིས་འདུག་ཟེར་བ་སོགས་དཔོན་ཆེན་ཞིག་ལ་དྲག་ཤུལ་འདི་ཉིད་ཆེའོ། །
དེའི་རྗེས་སུ་གཞོན་དབང་བསྐྱར་ནས་བསྐོས་པ་ལམ་དུ་གྲོངས། དེ་ནས་ལེགས་པ་དཔལ། སེངྒེ་དཔལ། འོད་ཟེར་སེང་གེ་འདིས་སྭོན་ཇིང་དབེན་གྱི་དམ་ཁ་བཟུང་། དེ་ནས་ཀུན་རིན། དོན་ཡོད་དཔལ། ཡོན་བཙུན། ཡང་འོད་ཟེར་སེང་གེ་རྒྱལ་བ་བཟང་པོ། རྒྱལ་བ་བཟང་པོ། དབང་ཕྱུག་དཔལ། བསོད་ནམས་དཔལ།