[A:༡༢༩]མང་དུ་བླངས་ཏེ་བག་མེད་ཀྱི་སྤྱོད་པ་བྱེད་པར་བརྩམས་པས། བདག་ཆེན་རིན་པོ་ཆེར་འབུལ་རྒྱུའི་རྟ་ལ་ཆིབས་ཏེ་མ་བཞུགས་པར་བྱོན་པས་གཞན་རྣམས་ཀྱང་ཕྱི་ལ་ཡོང་དགོས་པ་བྱུང་ཞིང་། སྐབས་འགར་གུང་གི་དྲོ་འཕྱིས་པས་མ་གསོལ་བ་སོགས་རབ་ཏུ་བྱུང་བའི་བླ་མར་ཁས་འཆེ་བ་འགའ་ཞིག་ལས་འདི་ཉིད་བསླབ་པ་ལ་གུས་ཤིང་། གོང་དཀར་བས་མི་ཁལ་ལ་གནོད་པ་བྱས་པར་ངོས་ཀྱིས་བྱོན་ཏེ་བཅྭ་ཧུ་བསྟན་ནས་ངའི་འགོ་ཁག་ཁྱེད་རྣམས་ལ་ཡོད་དོ་ཞེས་སོགས་ཀྱི་ན་ཕྲ་མོ་ནས་གསུང་སྒམ་པོ་བྱོན་པས་འཇིགས་ཏེ་གཏོང་ལེན་དང་བཟོད་གསོལ་བྱས། གན་པ་ཕུར་ལྕང་གོང་གི་རྒྱལ་པོས་བར་ཆད་བརྩམ་པ་སྒོམ་བཟླས་མཛད་པས་མ་ཚུགས། དེ་ནས་རིམ་གྱིས་ས་སྐྱར་ཕེབས་ཏེ། དཔོན་ཆེན་འོད་ཟེར་སེང་གེས་བན་རྩ་བྱས་ནས་བདག་ཆེན་རིན་པོ་ཆེར་ཕག་གྲུའི་དཔོན་པོ་འདི་སློབ་གཉེར་བྱུང་ན་རབ། མ་བྱུང་ན་བཞི་ཐོག་པའི་དྲུང་འཁོར་ལས་ཚན་ཞིག་ཞུས་འདུག་པ་ལྟར་དམ་གཉེར་ལ་བསྐོས་ནས། བདག་ཆེན་པ་ཐུགས་གཏུམ་པས་གསོལ་གཟིམས་དམ་གཉེར་སོགས་ལ་བཀའ་བཀྱོན་འཕྲལ་འཕྲལ་ཡོང་བ་ཞིག་འདུག་པས། དགོངས་པ་ཞུས་ཏེ་རང་བཞིན་ལས་ཚན་མེད་པར་བཞུགས། སྦྲུལ་ལོའི་དཔྱིད་ཆོས་ལ་ཆུ་མིག་ཏུ་ཕེབས་སྐབས་ཞབས་ཕྱིར་མཚན་ཉིད་ཀྱི་བླ་མ་འཇམ་དཔལ་དང་། སྔགས་ཀྱི་བླ་མ་ཀུན་དབང་སོགས་དགེ་བའི་བཤེས་གཉེན་གྱི་རིམ་པ་དང་། དཔོན་ཆེན་དབང་ཕྱུག་དཔལ། སང་ཡེ་དཔོན་པོ། བ་དེ་ལུང་པའི་དཔོན་པོ། སྟག་ལུང་དཔོན་པོ་རྣམས་ཀྱི་སྡེབས་ཁར། སི་ཏུ་ལ་ཕག་གྲུ་དཔོན་པོར་འབོད་ཅིང་། དཔོན་པོ་རྣམས་ཀྱི་ནང་ནས་མཐོང་བཟོས་ཆེ་བར་མཛད། ཆག་ཆག་ལ་ཁར། བདག་ཆེན་རིན་པོ་ཆེ་ཆིབས་བཤོལ་སྐབས་སི་ཏུའི་ཆིབས་འཛིན་པ་སྔོན་ལ་སོང་ནས་མེད་པས། ཆིབས་འདྲོགས་ཏེ་རྒྱང་རིང་པོར་ཁྱེར་བས། རྒྱལ་ཚ་རིན་དབང་གིས་རྟ་ནས་བབས་ཏེ་རོགས་བྱས་འདུག་པ་ཡར་ཀླུངས་པའི་ཞེན་ཡིན་འདུག་ཅིང་། བཀའ་ཆེམས་སུ། ང་རྟ་