[A:༡༩༥]འདུ༔
དེ་ལྟའི་བསྟན་པ་མི་ལོ་དྲུག་ཅུ་འབྱུང༌༔
ཞེས་པ་འབྲི་གུང་པ་དང་ཕག་གྲུའི་བསྟན་པ་གཡག་ཙམ་ལས་རྭ་ཅོ་དང་མཇུག་མ་ལུས་པའི་ཚོད་ཙམ་གྱི་དུས་རྟགས་དང་གནས་ཚད་བསྟན་ནོ། ། དེ་ཡང་རྒྱལ་བ་བཙོང་ཁ་པ་ཆེན་པོའི་ཐུགས་རྗེའི་བདུད་རྩི་གང་གི་གསང་བ་གསུམ་གྱི་ཟ་མ་ཏོག་ཏུ་བལྟམས་པས་ཆོས་སྲིད་མཐའ་དག་གསེར་གྱི་འཁོར་ལོས་སྒྱུར་བའི་རྒྱལ་པོའི་དཔལ་ལ་འགྲན་པ་འདི་བཞིན་ནོ། ། སྨྲས་པ།
དབྱངས་གསལ་སྡེབ་ཀྱིས་སྲ་བར་བཅིངས་པའི་ལྕགས་རིའི་ཁོར་ཡུག་དབུས་ན་མངོན་མཐོ་གླེགས་བུའི་རིན་ཅེན་རྡུལ་མང་བརྩེགས་པའི་བ་གམ་ན༎
འགལ་བའི་ཁུར་མང་གྱ་གྱུའི་ཚུལ་སྤངས་ལེགས་བཤད་ཁམས་ཀྱི་དྭངས་མ་ཀུན་བསྡུས་ཚར་དུ་དངར་བའི་དེབ་ཐེར་རི་དྭགས་མིག་ཅན་མ༎
ཉམས་འགྱུར་འཇོ་སྒེག་གར་གྱི་རྣམ་རོལ་བཅད་ལྷུག་སྤེལ་མའི་དབྱངས་བདུན་ལྷུར་ལེན་ཚིག་དོན་མ་འདྲེས་ཟུར་མིག་དབང་གཞུ་ལྟར་འཁྱུག་ཅིང་༎
མངོན་བརྗོད་ཨུ་དུམ་ཝཱ་རའི་འཕྲེང་མཛེས་གཏམ་རྒྱུད་མགོ་སྐྱེས་གཡོན་འཕྱང་མ་འདི་བློ་ལྡན་བརྒྱ་བྱིན་དག་ལས་གཞན་གྱི་སྤྱོད་ཡུལ་མིན༎
ཀ་རཎྜ་ལྟར་ཡ་རབས་མཆོག་གི་སྤྱོད་ཚུལ་སྣོད་དུ་ཅ་ཅོའི་ངག་སྤངས་ཁུངས་ལྡན་ལོ་རྒྱུས་དབུས་འགྱུར་ཏ་ལའི་གླེགས་བམ་ཇི་བཞིན་རབ་གསལ་པ་རི་ཛྲཱ་ཡི་པུསྟ་ཀ༎
ཁ་དོག་ཚིག་དོན་མ་འདྲེས་ལང་ཚོ་རྣམ་པར་བཀྲ་བའི་ཆ་ཤས་