[A:༨༠]པར་བརྒྱུད་པའི་མཛད་པ་ངོ་མཚར་བ་བསྟན། ཁྱད་པར་རྒྱ་གར་དུ་འབྱོན་པའི་བསྐུལ་མ། པཎྜི་ཏ་བསོད་སྙོམས་པ་གཅིག་གིས་རྒྱ་དཔེ་ཀློག་མ་མཁྱེན་པས་ཐུགས་ཕྱུང་ནས། ཤིང་གི་གྲིབ་མ་ལ་གཟིམས་པའི་མནལ་ལམ་དུ་མཁའ་འགྲོའི་རྟགས་ལྡན་གྱི་བུད་མེད་ཅིག་གིས། སྲིན་བུའི་ཁ་ཆུས་རང་ལུས་བཅིངས་པ་ལྟར། ། ཡུལ་ལ་ཞེན་པས་བདུད་ཀྱི་རྒྱ་རུ་ཚུད། ། དེ་འདྲ་ཐར་པར་འདོད་པའི་མི་སུ་དག་། བྱང་ཕྱོགས་ཁ་ཆེའི་ཡུལ་དུ་ཕྱིན་ནས་ཀྱང་། ། རྒྱ་གར་ཤར་ནུབ་ཆུ་བཞིན་མྱུལ་ནས་ནི། ། དམ་ཆོས་རྒྱ་མཚོ་བོད་དུ་བསྒྱུར་ན་བདེ། ། ཞེས་པའི་ལུང་བསྟན་བྱུང་བས་རྐྱེན་བྱས་ཏེ། དཀའ་སྤྱད་དུ་མས་ཁ་ཆེར་བྱོན། ཀ་ལ་ཝ་རི་བྱ་བའི་གྲོང་དུ་སླེབས། བྲམ་ཟེ་ཞིག་གིས་ཕྱག་གི་རི་མོ་བལྟས་ཏེ་ཤིས་པ་བརྗོད། རྐང་མགྱོགས་ཡིད་བཞིན་ནོར་བུ་བསམ་འཕེལ་བྱ་བ་ལ་བརྟེན་ནས་གྲོང་ཁྱེར་ཏ་མ་ལ་སནྟིར་བྱོན་ནས། པཎྜི་ཏ་ཤྲདྡྷཱ་ཀ་ར་ཝརྨ་དང་མཇལ་ཏེ། ཡོ་གའི་རྒྱུད་སྒྲུབ་ཐབས་རྣམས་གསན་ཅིང་བསྒྱུར། པཎྜི་ཏ་གཞན་མང་པོ་ལའང་སྒྲོ་འདོགས་བཅད་དེ་བོད་དུ་འབྱོན་པར་བཞེད་པའི་ཚེ། རྨི་ལམ་གྱི་ལྟས་ལ་བརྟེན་ནས་པན་ཆེན་ནཱ་རོ་པ་དང་། ཀ་མ་ལ་གུཔྟ། ཛི་ན་མི་ཏྲ་སོགས་ལ་ཟབ་པ་དང་རྒྱ་ཆེ་བའི་ཆོས་དཔག་ཏུ་མེད་པ་གསན། མདོར་ན་པཎྜི་ཏའི་བླ་མ་ཡང་བདུན་ཅུ་རྩ་ལྔ་བསྟེན་པས་གསུང་རབ་རྒྱ་མཚོ་ཆེན་པོའི་ཕ་རོལ་ཏུ་སོན་ཅིང་བསྟན་པ་ཕྱི་དར་ལ་སྐད་གཉིས་སྨྲ་བ་འདི་ཉིད་འགྲན་ཟླ་ཐམས་ཅད་དང་བྲལ་བས། མཁས་པའི་དབང་པོ་ཡེ་བཟང་རྩེ་བས་ཀྱང་བསྟན་པ་སྔ་དར་ལས་ཕྱི་དར་སྔགས་ཀྱི་བསྟན་པ་བོད་དུ་དར་བ་ཡང་། ལོ་ཙཱ་བ་འདི་ཁོ་ནའི་བཀའ་དྲིན་ཡིན་ཞེས་ཆེ་བ་མཛད་པ་ཡིན་ནོ། །
ལྷ་ལྡེ་ལ་སྲས་འོད་ལྡེ། ཞི་བ་འོད། བྱང་ཆུབ་འོད་དང་གསུམ་ལས། ཆུང་བ་དགེ་སློང་བྱང་ཆུབ་འོད་བྱ་བ། ཕྱི་ནང་གི་ཆོས་དང་ལོ་ཙཱ་ལ་ཤིན་ཏུ་མཁས་པ་ཞིག་བཞུགས་ཤིང་། དེ་ཡང་ཡེ་ཤེས་འོད་རང་གི་གཅུང་ལ་རྒྱལ་སྲིད་