[A:302]bcas pa shar phyogs kyi rgyal khams rnams su byon par gyur to/ /de'i tshe gtsang gi sa cha la gnas pa'i skye bo thams cad kyis chos zhu zhing phyi bzhin 'brangs par gyur te/ dbus su byon nas skye bo phal mo che theg pa gsum la bcug cing / bla na med pa'i byang chub tu nges par mdzad nas/ de'i dus su bdag nyid chen po 'dis mkhyen rab kyi dbang phyug sa skya paNDi ta la mkhan po zhus nas/ dge ba'i bshes gnyen zul phu ba la slob dpon zhus/ de'i bslab bya rnams dge ba'i bshes gnyen skyor mo lung pa las legs par gsan cing rab tu byung nas mtshan yang blo gros rgyal mtshan dpal bzang po zhes gsol nas ngur smrig gi rgyal mtshan gyis mdzes par byas shing / bsnyen par rdzogs nas lo brgya lon pa'i dge slong gi dngos po dang 'dra bar gyur to/ /de'i tshe skyes bu dam pa 'di rab tu byung bas sangs rgyas kyi bstan pa dang / lha'i phyogs ni zla ba yar gyi ngo bzhin 'phel bar gyur la/ nag po'i phyogs dang lha ma yin rnams ni 'grib par gyur to/ snyan pa'i grags pas sa steng thams cad khyab par gyur cing / sa bla'i lha rnams kyis rgyal chen rigs bzhi'i lha rnams dang / rgyal chen rigs bzhi pa rnams kyis sum cu rtsa gsum pa rnams la bsgrags shing de bzhin du 'og min gyi bar du bsgrags par gyur te/ dran pa nye bar gzhag pa las/ skyes bu dam pa rnams rab tu byung ba'i tshe 'di lta bu 'byung bar bshad pa'i phyir ro/ /de nas rim gyis mdo khams dang / mdo smad dang / byang ngos kyi sa char byon te/ de dag rnams su yang theg pa gsum gyi chos kyi 'khor lo rgya chen po bskor zhing gdul bya dpag tu med pa grol bar mdzad do/ /de nas bdag nyid chen po 'di dgung lo bcu bdun bzhes pa'i tshe/ chos kyi rje nyid la mnga' ba'i yon tan gyi chos thams cad yongs su rdzogs par gyur te/ 'gro ba phal mo che yang 'di nyid kyis 'dul bar chos kyi rjes gzigs nas chos kyi dung dang lhung