[A:303]bzed la sogs pa bdag nyid chen po 'di la gtad nas/ da ni khyod kyi bstan pa'i bya ba dang / sems can dpag tu med pa'i don bya ba'i dus la babs pas sngon gyi dam bcas pa dran par gyis shig ces gsungs nas slob ma'i tshogs dang rgyal ba'i bstan pa rin po che gtad de ngo mtshar ba'i ltas du ma bstan nas bde bar gshegs par gyur to/ /de'i tshe slob ma'i tshogs thams cad kyang chos kyi rje zhi bar gshegs kyang / de nyid kyi sku'i bkod pa gnyis pa'am/ de nyid kyi yon tan gyi phung po chen po 'phags pa 'di bzhugs so zhes mya ngan dang yid mi bde ba gang yang med cing dam pa'i chos 'chad pa dang nyan pa la sogs pa bstan pa'i bya ba ma bsgrims par lhod par ma gyur to/ /snyigs ma'i dus 'dir thub dbang gnyis lta bu/ /chos kyi rje de zhi bar gshegs na yang / /de yi sku ni gnyis pa bzhag pa'am/ /yon tan phung po 'di ni bzhugs so zhes/ /slob ma'i tshogs la mya ngan sdug bsngal med/ /'phags pa'i sku ni zla ba nya 'dra la/ /rgya mtsho lta bur shin tu zab pa'i thugs/ /tshangs dbyangs lta bur gsung dbyangs sgrogs mthong nas/ /slar yang dga' ba lhag par 'phel bar gyur/ /de nas chos kyi rje zhi bar gshegs pa'i rjes kyi bya ba chen po rnams rim pa bzhin bsgrubs/ slob ma'i tshogs dang skye dgu phal mo che ni theg pa gsum gyi chos kyi dga' ston gyis yang dag par mgu bar byas nas rim gyis sa'i bdag po ji gyim gan nas rgyal rabs lnga srid pa'i skye ba dpag tu med par legs par bsags pa lhun po ltar gtos che zhing / ring du sbyangs pa'i blo gros nyi ma'i dkyil 'khor ltar gsal zhing gzi brjid che la/ rgya mtsho mching rnam chen po ltar mi 'khrug cing / dal 'byor rin po che du mas 'byor pa stobs dang / brtson 'grus dang pha rol gnon pa mtshungs pa med pas sa'i steng na 'gran zla med cing / rgya mtsho mtha' klas pa'i