[A:127]དུ། ཡི་གེ་པ་ནི་བློ་བཟང་ཆོས་ཀྱི་རྒྱལ་མཚན་ནོ་ཞེས་འབྱུང་བས་སོ༎
ལོ་ཙ་བ་འདིས་ཀྱང་ཚད་མའི་བརྒྱུད་འདེབས་ཁ་ཆེ་པཎ་ཆེན་གྱི་གོང་མ། ཝ་གཱིནྡྲ་པཎྜི་ཏ་སྟེ་པཎ་ཆེན་ངག་དབང་ཟེར་བ་ལ། ཝ་བུ་པཎ་ཆེན་དང། པཎྜི་ཏ་ཆོས་ཀྱི་ཉིན་བྱེད་ཀྱིས་རྒྱ་གར་གྱི་ལམ་ནས་ཞུ་ཡིག་ཕུལ་བའི་རྒྱ་སྐད་ལ། དྷརྨ་དཱི་པ་ཀ་ར་ཞེས་བོད་སྐད་ཆོས་ཀྱི་ཉིན་བྱེད་ལ་ཆོས་ཀྱི་སྣང་བྱེད་དུ་བྱས་པ། འཇམ་དབྱངས་དཀར་པོའི་ས་བོན། རྫོགས་པའི་སངས་རྒྱས་ཨ་ལས་བྱུང། ཞེས་ཨ་ཐུང་ཡིན་པ་ལ་འབྲུག་གསུམ་གྱི་ཟླས་ཕྱེ་བའི་ཨཱཿ་ཡིག་ཏུ་བྲིས་པ་སོགས་དཔྱད་རྒྱུ་ཅུང་ཟད་ཅིག་འདུག་ཀྱང། སྔོན་ནི་སུས་ཀྱང་གླེང་བརྗོད་མ་མཛད་སྣང་ངོ༎
དེའི་དཔྱིད་ཆོས་ལ་ཉུག་རྒྱལ་ཁང་དུ་ཕེབས་ཤིང། དེར་མངའ་རིས་གློ་བོ་ནས། རྒྱལ་ཚབ་ཀུན་དགའ་དབང་ཕྱུག་པའི་དྲུང་ཞིང་བརྗེས་པའི་མང་ཇ་ཞུ་མི་སླེབ་པས། ལྔ་མཆོད་པ་སོགས་སྔར་གློ་བོར་བཀའ་ཆོས་ཞུས་པའི་གྲྭ་རིགས། བདག་གི་བླ་མ་རྗེ་བཙུན་ཀུན་དགའ་མཆོག་གྲུབ། པཎ་ཆེན་བྱམས་པ་གླིང་པ་དཔལ་ལྡན་ཚུལ་ཁྲིམས་པ་སྐུ་མཆེད། བྲག་དཀར་ཆོས་རྗེ་ཡོན་ཏན་བཟང་པོ་བ། དབུ་མཛད་ཀུན་རྒྱལ་བ་སོགས་དྲག་རིགས་རེ་རེས་ཐོས་མཆོད་ལ་མང་ཇ་རེ་ཞུས་ཞིང། དེར་པཎ་ཆེན་རིན་པོ་ཆེ་དང། དགོན་པ་ཤར་ན་རྗེ་དོན་ཡོད་དཔལ་བ་བཞུགས་པའི་ཡབ་སྲས་གཉིས་ཀའི་དྲུང་དུ་བསྔོ་རྟེན་སོ་སོ་དང་བཅས་པ་ཟླ་ཕྱེད་ཙམ་བསྒྲུབས་རྗེས། པཎ་ཆེན་རིན་པོ་ཆེའི་གསུང་གིས། ངེད་ཀྱིས་ཐོས་མཆོད་ལ། རྗེ་རྡོ་རྗེ་འཆང་གི་བཀའ་འབུམ་གྱི་ལུང་ཞིག་སྒྲོག་གསུང། ཉུག་པའི་ཕྱག་དཔེའི་སྟེང་ནས་པོད་བཞི་མའི་ལུང་ཞག་རེ་ལ་པོ་ཏི་ཕྱེད་ཕྱེད་ཞག་བརྒྱད་ལ་རྫོགས་པར་གནང་ཞིང། སྔར་སྨྲོས་པའི་མངའ་རིས་པའི་ཆེ་བཙུན་དེ་རྣམས་ཀུན་གྱིས་གསན་ནོ༎
དབྱར་ཞལ་བཞེས་གསེར་མདོག་ཅན་དུ་མཛད་ཅིང། འདིའི་ལོ་མངོན་པ་ཀུན་ལས་བཏུས་ཀྱི་དཀའ་འགྲེལ་གྱི་ཐུགས་རྩོམ་ཡང་གནང། དེའི་གྲུབ་མཐའ་བསྡུས་པ་དང། རབ་བྱེད་གསུམ་གྱི་ཊཱི་ཀ་ཡང་ཕྱིས་མཛད་དོ༎
དེ་ལྟར་གཙང་ཕྱོགས་སུ་ལུག་སྤྲེ་བྱ་ཁྱི་vc: 1475-78སྟེ་ལོ་ངོ་བཞི་གདན་ཆགས། གཙང་ཕྱོགས་ཀྱི་ཕྲིན་ལས་ཀྱི་རྨངས་གཞི་ཐིངས་ནས། སླར་གླང་ཐང་ནས་སྤྱན་སྔ་བློ་གྲོས་རྒྱལ་མཚན་པའི་ཆོས་འཁོར་རྩེའི་གྲྭ་སྡུད་བྱས་པའི། གྲྭ་པ་འདི་ཕྱོགས་ཀྱི་དྲག་བསྡུས་རང་འདི་དག་རབ་བྱུང་གནང་བའི་ཆེད་དུ་དེ་ནས་ཞབས་མ་བསྐྱོད་ན། ངེད་རྣམ་པ་ཆེ་ཕྲ་ཀུན་གྱི་བསམ་པ་གཏན་མི་གང་བ་ཡོད་པས་ཤེས་ནན་ཞུས་རང་གནང་བའི་དབང་ལས། དབུས་ཕྱོགས་སུ་ཆིབས་ཁ་བསྒྱུར་བ་གནང་སྐད་དོ༎
འདི་སྐབས་རྣམ་ཐར་རྗེ་དབོན་མར། གསེར་འཕྱང་མེ་མོ་བྱ་ལོ་vc: 1477འཕེབས་གསུང་བ་ནི་ཐུགས་རྟོག་མ་ཆུག་པ་ཡིན་ཏེ། དེ་ལྟར་ན་ལོ་བཞི་གཙང་དུ་བཞུགས་ཤེས་གོང་དུ་བྲིས་པ་ལ་ལོ་གཅིག་མི་ཚང་བས་སོ༎
དེ་ནས་ས་ཕོ་ཁྱི་ལོ་vc: 1478སྨིན་དྲུག་གི་ཟླ་བ་ངོ་དཀར་ཙམ་ལ་གཙང་ཕྱོགས་ནས་ཞབས་ཟུང་གི་འཁོར་ལོ་བསྐྱོད་བདེ་བར་བསྐུལ་ཏེ། རིན་སྤུངས་ནས་དཔོན་སློབ་ཐམས་ཅད་ལ་གསོལ་ཕོགས། ལམ་ཆས་རྒྱ་ཆེར་བཏབ་ནས། སྡེ་སྣོད་འཛིན་པ་བརྒྱ་ཕྲག་ལྔ་ལྷག་ཙམ་གྱིས་མདུན་ནས་བདར་བཞིན་དུ། ངུར་སྨྲིག་གི་ཇོ་མོ་སྒྲོལ་མའི་དྲུང་དུ་སྙན་དར། དཀར་མེ། གསེར་ཆབ་ཞུས། དཔོན་སློབ་ཡོངས་ཀྱིས་ལྷན་ཅིག་གསོལ་བཏབ་གནང་ནས། རིམ་གྱིས་དཔལ་བདེ་དང། གོང་དཀར། ལུམ་པ་རྣམས་ཀྱི་ཞག་ཕོག་དང་བསྟུན་པའི་ཞབས་ཏོག་བསྒྲུབ་པའི་ངང་ནས། དྲང་སྲོང་སྲིན་པོ་རིའི་བདེ་མཆོག་མཇལ་བ་ལ་ཕེབས་ཤིང། དེའི་ནུབ་པཎ་ཆེན་རིན་པོ་ཆེའི་ཞལ་སྔ་ནས། བདེ་མཆོག་ལྷ་ཁང་ཉིད་དུ་གཟིམས་པས། སྲོད་ཀྱི་ཆ་ལ་བདེ་མཆོག་ལྷ་དཔའ་བོ་གཅིག་པ་དེ་ཉིད་ཞལ་བཞི་ཕྱག་བཅུ་གཉིས་པའི་སྐུར་གཟིགས་ཤིང། དེའི་གླང་ལྤགས་ནམ་མཁའ་ལ་གདུགས་བསྐོར་བ་ལྟར་གཟིགས་ནས། པཎ་ཆེན་