[A:67]ཏུ་དགེས་ཏེ། ད་ནི་འདི་ལྟ་བུའི་བསྟན་འཛིན་གྱི་སྐྱེས་བུ་དམ་པ་འདི། ས་འདིར་སྤྱན་ཅི་ནས་འདྲོངས་པར་བྱས་ནས་སངས་རྒྱས་ཀྱི་བསྟན་པ་ཡོངས་སུ་རྫོགས་པའི་རྒྱུན། རྒྱ་ཆེན་པོ་དར་ཞིང་རྒྱས་པའི་བྱ་བ་བསྒྲུབ་པ་ཉིད་ལ་ནན་ཏན་དུ་བགྱིད་དོ༎ ཞེས་ཐུགས་ཀྱི་ཡུལ་དུ་དགོངས་ནས་ཡང་ནས་ཡང་དུ་གསུང་བྱོན་པ་ཡིན། ཞེས་དེ་དུས་ཀྱི་ཞབས་འབྲིང་དག་ཅིག་གི་ངག་ནས་གླེང་ངོ༎
དེར་གསང་ཕུའི་དགུན་ཆོས་གྲོལ་ནས། འཕྲང་ཕུའི་དཔྱིད་ཆོས་མ་ཚུགས་བར་དུ་གྲྭ་ཐང་དུ་ཕེབས་ནས། ཆོས་རྗེ་དགེ་བ་རྒྱལ་མཚན་པའི་དྲུང་དུ་ཚད་མ་རིགས་པའི་གཏེར་རང་འགྲེལ་དང་བཅས་པ་འུ་ཡུག་པའི་རིགས་མཛོད་དང་སྦྱར་བའི་ཟབ་བཤད་ཉིད་ལེགས་པར་གསན་ཞིང། དེར་ཆོས་རྗེ་ཤེས་རབ་ཟླ་བ་སོགས་ཀྱིས་ཞུས་པའི་ཟླ་ལ། རྡོ་རྗེ་འཇིགས་བྱེད་ཀྱི་དབང། རྣལ་འབྱོར་བཞིའི་ཁྲིད་ཀྱང་གསན་ནོ༎
དེ་མཚམས་འཕྲང་ཕུར་དཔྱིད་ཆོས་ལ་ཕེབས། དེ་གྲོལ་རྗེས་འཕྲང་ཕུ་ན་ཐ་སྙད་ཀྱིས་པཎ་ཆེན་རིན་པོ་ཆེ་ཉིད་ཀྱི་ཨ་ནེར་མཚོན་པའི་འཕྲང་ཕུ་བའི་ཡུམ་བགྲེས་མོ་ཞིག་བཞུགས་པ་དེས་བསླབ་བྱ་མཛད་པ་ནི། དྲུང་ནས་ཁྱེད་ལ་སྐུ་ཚེ་རིང་བ་ཅིག་པུས་ཆོག་པར་སྣང་བས། ཚེ་བསྒྲུབ་རང་ལ་འབུངས་མཛོད་ཅིག། སྐུ་ཚེ་རིང་ན་དེ་བར་ལ་ད་ལྟའི་འགྲན་ཚོལ་རང་མཉམ་ཡོ་རྫོགས་ནས། འགྲན་ཟླ་ཀུན་བྲལ་གྱི་བསྟན་པའི་བྱ་བ་རླབས་ཅན་རང་འབད་མེད་དུ་མཛད་རྒྱུ་ཡོད་པས། རང་རེ་བོད་འདྲ་བའི་གདམས་ངག་འདི་ཀུན་ལ་ཟུངས་ཤིག་རང་མི་སྣང། ན་ནིང་ཤེད་འདི་ན་མར་ལ། པཎྜི་ཏ་ཤཱ་རིའི་པུ་ཏྲོ་བྱ་བ་དགུང་ལོ་བརྒྱ་ཙམ་ལོན་ངེས་ཡིན་ཟེར། འཕྲལ་ནི་དགུང་ལོ་ལྔ་བཅུ་ང་བགྲང་ཙམ་འགྲོ་བའི་ཚོད་ཅིག་འདུག། ཁོང་ཀུན་ལ་འཆི་མེད་གྲུབ་པ་བྱ་བའི་གདམས་པ་བཞུགས་ཟེར་ནའང། དེ་ཀུན་ནི་ཁམས་ལ་བྱས་རྒྱ་ནག་རྒྱལ་པོས་སྤྱན་དྲངས་སོང་ཟེར། ད་ལྟ་ཡང་བསམ་ཡས་ན་རྒྱ་གར་གྱི་པཎྜི་ཏ་ནགས་