[A:༧༡བ]འཚོགས་པའི་དུས་སུ་ཨེ་ཀ་འུན་དང་། ཧོར་གྱི་ལྷ་པ་གྲལ་མགོར་འཇོག་པ་ཡོད་པ་འདུག དེ་ནས་རྒྱལ་པོ་དང་བླ་མ་ཆོས་རྗེ་པ་ཆོས་ཀྱི་གསུང་གླེང་མང་པོ་མཛད་པ་ལ། མགོ་བའི་སྐབས་སུ་ཡུ་གུར་གྱི་དགེ་བའི་བཤེས་གཉེན་མཁས་པ་མང་པོས་ཀྱང་མཚམས་སྦྱོར་བྱས་ནས་ཆོས་ཀྱི་དོན་ཐམས་ཅད་ལེགས་པར་གོར་བཅུག་པས། རྒྱལ་པོ་ཡང་ཤིན་ཏུ་མཉེས་པར་གྱུར་ནས། དེ་རིང་ཕྱིན་ཨེ་ཀ་འུན་དང་ལྷ་པ་ཚོ་བནྡེའི་གྲལ་མགོར་མ་སྡོད། ཐམས་ཅད་ཀྱི་གྲལ་མགོར་བླ་མ་ཆོས་རྗེ་པ་བཞུགས་ལ་སྨོན་ལམ་འདེབས་པའི་དུས་སུ། སྔོན་ལ་བནྡེས་སྨོན་ལམ་ཐོབ་གསུངས་པའི་ལུང་བྱུང་ནས་ཧོར་གྱི་རྒྱལ་ཁམས་སུ་རབ་ཏུ་བྱུང་བའི་དབུ་འཕང་བསྟོད་དེ། དེ་ནས་རྒྱལ་པོ་གོ་དན་ལ་ཤ་ཁྲའི་ནད་ཅུང་ཟད་བྱུང་བའི་རིམ་གྲོར་ཆབ་གཏོར་འཇམ་དཔལ་མ་མང་དུ་མཛད་པས། ལུག་ལོ་ཟླ་བ་གསུམ་པའི་ཚེས་བཅུ་གཅིག་གི་ཐོ་རངས་མནལ་ལམ་དུ་མི་འཐེང་པོ་ལུས་ལ་རྨ་དང་ཤུ་བས་གང་བ་ཅིག་བྱུང་བ་ལ། ཁྱོད་སུ་ཡིན་དྲིས་པས། ང་ལ་དཔོན་པོ་གཅིག་ཡོད་པ་ན་རེ། ས་སྐྱ་པས་འབོད་ཅིང་འདུག་པས་ཁྱོད་སོང་ལ་ཅི་ཟེར་ཉོན། ངའི་ལུས་པོ་ན་ནས་འགྲོ་མི་ནུས་པ་འདུག་ཟེར་ནས་ཡོང་བ་ཡིན་ཟེར། དེ་ནས་ཆོས་རྗེ་པས། གོ་དན་གྱི་གསེར་ཡིག་པ་བཏང་ནས་ངེད་ཐག་རིང་པོ་ནས་བོས། ད་འདི་ལ་ཕན་པ་ཅིག་དགོས་པ་བྱུང་བས་ནད་འདིའི་རྒྱུ་ཅི་ཡིན། ད་ཐབས་ཅི་བྱས་ན་ཕན་ཞེས་དྲིས་པས། མི་དེ་ན་རེ། ཡུལ་ཕྱོགས་དེ་རྣམས་སུས་ཀྱང་མ་བདག་པའི་དུས་སུ་ངའི་དཔོན་པོ་དེས་བདག་བྱས་པ་ཡིན། དེའི་ཚེ་གོ་དན་འདིའི་ཤཱཀྱ་མུ་ནེ་ལ་བསོད་ནམས་བསགས་པའི་རྒྱལ་པོ་ཅིག་ཏུ་སྐྱེས། དེ་ནས་ཚེ་འཕོས་ཏེ་མི་