[A:༨༡བ]སྤོས་ཕུལ། བཅོ་ལྔའི་སྔ་དྲོ་ཡང་ཕྱི་ན་བཞུགས་པའི་དུས་སུ་སྤྲིན་སྔར་གྱི་དེ་འདྲ་བ་ཅིག་བྱུང་། འཇམ་དབྱངས་ལན་གསུམ་གཟིགས། ཡང་སྤོས་ཕུལ། སྤོས་ལན་གསུམ་ཕུལ་བའི་རྟིང་མ་ང་ལ་གཟིགས་ནས་བཞད་ཅིག་མཛད། ཅི་ལགས་ཞུས་པས། འཇམ་དབྱངས་དང་བྱམས་པ་གཉིས་བགྲོ་གླེང་མཛད་ཀྱིན་འདུག་གསུངས། དེའི་ཚིག་ཀྱང་གསུངས་པས་བརྗེད། དེའི་ཕྱིས་དེ་ཉིན་བསྐོར་བ་མཛད་དུས་སུ། མཆོག་སྦྱིན་དཔལ་གྱི་བཞུགས་ཁྲི་ཅོག་ཙེ་ཆུང་ཆུང་ཅིག་དང་། བཞུགས་འབོལ་ཅིག་བཟུང་ནས་སྔོན་ལ་འགྲོ། བདག་གི་དཔུང་པ་གཡོན་ལ་ཕྱག་གིས་བརྟེན་ནས་བཞུགས། མཆོད་ཁང་ཐད་སོར་བྱོན་པ་དང་བཞུགས་ཁྲི་དེ་ལ་བཞུགས་ནས། མཆོག་སྦྱིན་དཔལ་ཁྱོད་ཇ་སྐོལ་དུ་སོང་གསུངས། བདག་ལ་ཁྱོད་སོང་ལ་སྤོས་ཤིག་སྦྱོར་ལ་ཤོག་གསུངས། སྤོས་ཁྱེར་ཡོང་བ་དང་ཨ་ཡུ་ཏཱ་ར་གསུངས། སྒྲོལ་མ་ཞལ་གཟིགས་པར་འདུག ཚེས་བཅུ་བདུན་གྱི་ནམ་གུང་ཙམ་ལ། བདག་དྲུང་ན་ཙོག་གེ་ཡོད་པས་གཟིམས་པ་དེ་ཙོག་གེ་བཞེངས་ནས་ཁྱོད་ཀྱིས་ཅི་ཡང་མ་མཐོང་ངམ། གླུ་དབྱངས་རོལ་མོའི་སྒྲ་ཐོས་གསུངས། སློབ་དཔོན་ཇོ་གདན་དང་ངེད་མང་རབ་ཡོད་པས་རོལ་མོའི་སྒྲ་ཐོས། གཞན་ཅི་ཡང་མ་མཐོང་ཞུས་པས་བདག་ལ་གཟིགས་ཏེ། བདེ་མཆོག་གིས་གཙོ་བྱས་པའི་དཀྱིལ་འཁོར་བཅུ་གསུམ་གྱི་སྣང་བ་བྱུང་གསུངས། དཔའ་བོ་དང་དཔའ་མོ་ཐམས་ཅད་ཀྱིས་གླུ་དང་གར་མཛད་ཅིང་འདུག་གསུངས། ཚིགས་བཅད་མང་པོ་ཅིག་གསུང་བ་བདག་གིས་མ་ཟིན། སློབ་དཔོན་ཇོ་གདན་གྱིས་མང་རབ་ཅིག་ཟིན་སྣང་བ་འདིར་མ་བྲིས། གཞན་ལ་མ་