[A:༨༡བ]བཤད་སྡིག་པ་གསོག་པའི་རྒྱུ་རུ་འགྲོ་གསུངས། ཇུ་གུར་མེ་མར་ན་དགེ་བཤེས་རྡོ་རང་ཟེར་བ་ཅིག་ན་གིན་ཡོད་པ། བདག་གི་སློབ་མ་རིན་ཆེན་རྒྱལ་མཚན་བལྟར་བཏང་བས། བཤང་གཅི་ཐམས་ཅད་མལ་དུ་བཏང་། གཡོག་པོ་མེད། སྡུག་པར་སྣང་བའི་ལོ་རྒྱུས་ཟློ་ཞིང་སྣང་བ་དང་། ཆོས་རྗེའི་ཞལ་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་མཁྱེན་བཞིན་དུ་ཐུགས་རྗེས་མི་གཟིགས་པ་གསུངས། དེའི་ནུབ་མོ་ཐོ་རངས་བླ་མ་རྗེ་བཙུན་པ་དང་། སློབ་དཔོན་བིརྺ་པ་དང་། ནག་པོ་པ་གསུམ་བྱོན་ནས་ཁྱོད་དེ་ལ་ཡི་མ་ཆད། ཟག་བཅས་ཀྱི་ལུས་འདི་ལ་སྐྱེ་རྒ་ན་འཆིའི་ཆུ་བོ་བཞི་ཡོད་པ་ཡིན་གསུངས། བིརྺ་པས་འཛུམ་པ་མཛད། ནག་པོ་པས་དེ་ཡིན་གསུངས། བིརྺ་པས་ཐོད་པའི་བདུད་རྩི་ལ་སྲིན་ལག་གིས་རེག་ནས་ཁྱོད་ཀྱི་ལྗགས་རྐྱོངས་གསུངས་ནས། ལྗགས་ལ་ཐིག་ལེ་བྱས་པའི་སྣང་བ་བྱུང་གསུངས། དེའི་དུས་སུ་རྟོག་པ་དང་རྟོག་མེད་མཐའ་ལས་འདས་པ། བདེ་གསལ་མི་རྟོག་པ་རྒྱལ་བ་རྣམས་ཀྱི་ཐུགས་ལའང་འདི་ལས་ལྷག་པ་མེད་སྙམ་པའི་སྣང་བ་བྱུང་། དེ་ནས་བླ་མ་རྗེ་བཙུན་པས་འདི་ནས་གཞན་དོན་ལ་འགྲོ་བའི་དུས་སུ། ཤར་ཕྱོགས་ཀྱི་འཇིག་རྟེན་གྱི་ཁམས་དུ་མ་བརྒལ་བའི་ཕ་རོལ་དུ་མཁའ་ལ་གནས་པའི་རིག་པ་འཛིན་པར་གྱུར་ནས། དེ་བཞིན་གཤེགས་པ་དུ་མ་མཉེས་པར་བྱས་ཤིང་། སངས་རྒྱས་ཀྱི་ཞིང་ཡོངས་སུ་དག་པ་དང་། སེམས་ཅན་དུ་མ་ཡོངས་སུ་སྨིན་པར་བྱས་ནས་ས་དང་ལམ་ཕལ་ཆེར་བགྲོད་དེ། སྐྱེ་བ་གསུམ་པ་ལ་འཛམ་བུའི་གླིང་འདི་ཉིད་ཀྱི་རྒྱ་གར་ཤར་ལྷོ་མུ་མུ་ནིར་ཞེས་བྱ་བར་རྒྱལ་པོ་ཉི་མའི་སྟོབས་འཕེལ་ཞེས་བྱ་བའི་བུར་འཁྲུངས་ནས་གཞོན་