[A:༨༢བ]འབུལ་རྒྱུ་མེད་པས། སྔོན་གནས་བརྟན་རྐང་པ་བཅོས་པའི་ཡོན་དུ་བྱིན་པའི་ཞྭ་ཕྲུག་གི་ཕྱམ་ཚེ་དམར་པོ་སོ་མ་ལེགས་པ་གཅིག་ཡོད་པ་དེའི་ཕུད་ཕུལ་ནས། ཆོས་རྗེ་རང་གིས་བསྣམས་ནས་ཡོད་པས། དེ་འབུལ་དགོས་སྙམ་པ་ཅིག་བྱུང་བས་ཞལ་འཛུམ་པ་ཅིག་མཛད་ནས། དེ་ང་ལ་འབུལ་མི་དགོས་དེ་སྔར་ངས་གྱོན་པ་དེ་ཕུལ་བ་ཡིན། ཁོ་བོས་བྱང་ཆུབ་དམ་པ་བརྙེས་པའི་དུས་སུ་ཨ་རུ་ར་ལག་མཐིལ་དུ་བཞག་པ་བཞིན་དུ། ཁྱོད་སློབ་མ་རྣམས་ཀྱིས་ཞབས་ཏོག་ཅི་བྱས་པ་ཐམས་ཅད་གཟིགས་པ་ཡིན། དེའི་དབང་བསྐུར་སེམས་བསྐྱེད་ཞབས་ཏོག་ཅི་བྱས་པ་ཐམས་ཅད་དང་། ཁོ་བོ་མཐོང་ཞིང་རྗེས་སུ་དྲན་པ་ཐམས་ཅད་དང་། རེག་པ་དང་། གཏམ་བྱས་པ་དང་། འབྲེལ་པ་བྱས་པ་ཐམས་ཅད་དོན་མེད་པར་མི་འགྱུར་བར་ངན་འགྲོའི་སྡུག་བསྔལ་ལས་གྲོལ་བ་ཡིན། དེས་ན་ཁྱོད་ཀྱང་ངའི་ཞབས་ཏོག་མང་པོ་བྱས་པས་དགའ་བ་སྒོམས་ཤིག་གསུངས། བདག་གིས་ནུབ་གཅིག་སྲོད་ནས་ཐོ་རངས་ཀྱི་ཆ་ཚུན་ཆད་ལ་རེས་སྐུའི་རྒྱབ་ནས་བརྟེན། རེས་སྐུ་སྟ་ཟུར་ནས་བརྟེན་པས། འདུལ་བ་རྒྱལ་མཚན་ལ་ཤོག་གསུངས་ནས། དཔོན་མོ་ཟོ་རོག་ཏས་ཕུལ་བའི་ཕྱམ་ཚེ་དེ་ཁྱེར་ལ་ཤོག་གསུངས་ནས། བདག་ལ་འདི་ཁྱོད་གོན། འུ་ཅག་གཉིས་ཚེ་སྔ་མ་ནས་འབྲེལ་པ་མང་པོ་ཡོད་པ་ཡིན་གསུངས། ཁྱོད་དང་པོ་ངའི་ཇ་འདྲེན་པ་བྱས། དེ་ནས་མི་ཉག་འགའ་རུ་ཇོ་འབུམ་གུག་ཤྲཱིའི་རྩར་བརྫངས། དེར་ཧོར་གྱི་དེད་པ་ལ་མ་ཤི་བས་ད་ལྟ་ངའི་ཞབས་ཏོག་མང་དུ་བྱས། ཕྱི་མ་ལ་ངའི་དྲུང་དུ་མི་སྐྱེ་ཁ་མེད་ཡིན་གསུངས། སྨལ་པོ་ཟླ་བའི་ཡར་ཚེས་བཅུ་བཞིའི་ཐོ་རངས་ཀྱི་ཆ་ལ་སྣ་ཚོགས་རྒྱལ་མཚན་དང་། རོལ་