[A:༤༧བ]དཔལ་ལ་ཐོས། །རྒྱན་གྱི་བསྟན་བཅོས་དཎྜི་དང་། །དབྱངས་ཅན་མགུལ་རྒྱན་ལ་སོགས་པ། །དགེ་འདུན་དཔལ་ལ་ལེགས་པར་བསླབས། །མངོན་བརྗོད་བསྟན་བཅོས་འཆི་མེད་མཛོད། །དེ་ཡི་རྒྱ་ཆེར་འགྲེལ་བཅས་པ། །མཁས་པ་གསུམ་ལ་ལེགས་པར་གཏུགས། །ནག་མོ་ཁོལ་གྱི་སྙན་ངག་གསུམ། །བདེ་བར་གཤེགས་པའི་དཔལ་གྱིས་བཤད། །བྱང་ཆུབ་སེམས་དཔའི་སྐྱེ་བའི་རབས། །བདག་ཉིད་ཆེན་པོ་གཉིས་ལས་ཐོས། །གསང་བ་འདུས་པ་འཕགས་པའི་སྐོར། །ཡེ་ཤེས་ཞབས་ཀྱི་ཡན་ལག་རྣམས། །བདག་ཉིད་ཆེན་པོ་གཉིས་ལས་ཐོས། །དེ་ཉིད་ཀྱི་ནི་རྒྱུད་འགྲེལ་གསུམ། །བདེ་མཆོག་ཉུང་ངུའི་བཤད་པའི་རྒྱུད། །མཁའ་འགྲོ་རྒྱ་མཚོ་ལ་སོགས་བདུན། །ཀྱེ་རྡོ་རྗེ་ཡི་རྒྱུད་གསུམ་དང་། །དེ་ཡི་རྗེས་འབྲང་ཌོམྦིའི་སྐོར། །རྙོག་མེད་ཨ་རལླི་སོགས་གསུམ། །མགོན་པོ་མངོན་པར་འབྱུང་བའི་རྒྱུད། །དེ་ཉིད་འདུས་པ་འགྲེལ་བཅས་པ། རྡོ་རྗེ་རྩེ་མོ་དཔལ་མཆོག་དང་། །མཁའ་མཉམ་ཐམས་ཅད་གསང་བ་དང་། དེ་དག་གཉིས་ཀའི་འགྲེལ་པ་དང་། །ངན་སོང་སྦྱོང་བ་ཡན་ལག་བཅས། །ཁྲོ་བོའི་རྒྱལ་པོའི་རྟོག་པ་ཆེ། །དེ་བཞིན་གསང་བ་ཆེན་པོ་སོགས། །དཔུང་པ་བཟང་པོ་ལེགས་གྲུབ་དང་། །གསང་བ་སྤྱི་རྒྱུད་ལ་སོགས་པ། །མཚན་བརྗོད་བཤད་པ་ལུགས་བཞི་དང་། །བརྟག་གཉིས་འགྲེལ་པ་ཀུ་མུ་ཏི། །མུ་ཏིག་ཕྲེང་བ་པདྨ་ཅན། །རིན་ཆེན་ཕྲེང་བའི་རྣམ་བཤད་རྣམས། །ས་སྐྱའི་འཇམ་དབྱངས་ཉིད་ལས་ཐོས། །དུས་ཀྱི་འཁོར་ལོ་ཡན་ལག་བཅས། །བརྟག་གཉིས་བདེ་མཆོག་ཉུང་ངུ་ཡི། །འཕགས་པ་གཉིས་ཀྱི་སྟོད་འགྲེལ་བཅས། །རྣམ་སྣང་མངོན་པར་བྱང་ཆུབ་