[A:70b]rgyal khams 'di mi tshan che ba dang / shes pa 'char che bas ngo log byas kyis dogs nas/ lo skor re zhing skyes pa lo dgu yan chad re re nas bsad kyis mi 'dang bas/ khyu 'ded byas te phyi'i rgya mtshor 'debs pa las/ de dag la lhag par brtse bas rgyal po la bka' nan che bar stsal te/ des kyang dbang zhus pa'i yon du phul nas de phyin chad chad pa yin no zhes grags so/ /des na deng sang byang phyogs kyi rgyud 'dir bde skyid cung zad yod pa ni chos rje khu dbon gyi bka' drin thun mong ma yin pa yin te/ deng sang gi phal pa lta ci smos/ dge bshes su khas 'che ba rnams dang / de dag las kyang rig pa dang mi rig pa dpyod pa'i blo shin tu gsal zhing / bstan pa dang sems can gyi don gyi 'khur khyer bar grags pa dag kyang de ltar mi sems pa ni thugs mi ched pa'am thugs rtsing par zad do/ /des na khu dbon 'di gnyis kyis sems can la dngos su phan par mdzad pa 'di lta bu ni bod kyi dge bshes sus kyang byas pa med do/ /de la 'ga' zhig sa skya pa lha'i bu'i bdud kyis g.yengs pas hor dang 'brel lo zhes zer ba'ang mi rigs te/ hor gyi ngor rab tu byung ba yang hor dang spyod pa bstun pa cung zad byung yang / gal te sa skya pas de'i blo dang ma bstun na de chos la 'jug par mi nus te/ thub pas kyang 'jig rten gzhug pa'i don du 'jig rten mthun 'jug mdzad pa lta bu'o/ /de chos la ma zhugs na sngar bshad pa'i nyes dmigs rnams yong bas dgag bya bas dgos pa che ba yin no/ /'di ni byang chub sems dpa' sems dpa' chen po rnams kyi rmad du byung ba'i rnam par thar pa