[A:137a]gcung po 'gro ba'i mgon po phyag na rdo rje ni/ yab dgung lo nga drug la zhi bar gshegs pa'i sa mo phag gi lo g.yas ru mdog gi gad lo lo zhes bya bar lum mdog stod tsha na ma/ ma gcig kun skyid la legs par 'khrungs shing / dgung lo drug pa la chos rje sa paN gyi chag phyir hor yul la phebs/ sku gzhon nu nas sbyor sgrol nus shing / chos rje khu dbon la dbang dang gdams ngag mang du gsan nas thos pas rgyud phyug par mdzad/ brtul zhugs kyi spyod pas phas kyi rgol pa thams cad tshar bcad/ 'khor gsum nyi zer la 'gel nus pa dang / phyag mda' sa la 'phangs pa'i shul nas chu 'thon te/ deng sang gi bar du yang phyag mda' bsgrub chu zhes grags shing / chu gzhan pas khyad par du ma'i sgo nas khyad par 'phags pa kun gyi spyod yul du gyur pa 'di nyid la sogs pa grub pa'i mtshan ma bsam gyis mi khyab pa ston pa/ mdor na rigs gsum mgon po'i rnam 'phrul byon pa'i nang nas mthu stobs dang rdzu 'phrul che ba gsang ba'i bdag po phyag na rdo rje'i sprul par grags pa yin la/ 'di la hor rgyal po se chen gyis/ sa len dbang gi lung dang / gser tham thong phyi g.yas g.yon gyi khrims ra dang / gzhan yang 'di'i btsun mor rgyal po'i sras mo me kha bdun bya ba gnang / hor gyi chas su bcug ste chol kha gsum gyi khrims bdag tu bskos/ bod la ti shrI dang dbang gi las kha thog mar sku mched 'di gnyis kyi sku ring la byung bar grags pas bod la bka' drin shin tu che zhing / byang ngos su lo bco brgyad tsam bzhugs nas/ de nas