[A:137b]dgung lo nyer lnga pa la gdan sa chen po chos 'khor la phabs/ de nas lo gsum lhag tsam gyi bar du grub pa'i spyod pas 'gro ba mang po smin grol la bkod nas/ dgung lo nyer dgu pa me mo yos kyi lo zla ba bdun pa gro bzhin zla ba'i yar tshes gcig la sgo rum dpe khang du mya ngan las 'da' ba'i tshul bstan pa yin no/ /zangs tsha'i btsun mo gnyis pa yul sa skya'i chu mdo ma/ pha ming rje btsad/ ma ming ma gcig jo 'gro zhes bya ba la sras lcam sring gnyis 'khrungs pa'i gcen slob dpon rin chen rgyal mtshan ni/ yab dgung lo nga lnga pa sa pho khyi'i lo la gdan sa chen por 'khrungs shing / chos rje khu dbon dang / bla ma 'u yug pa'i drung du thugs gnyer mdzad de/ rgyud man ngag du ma mkhyen cing / 'di nyid kyis mdzad pa'i gsang sngags kyi dkyil chog dang / gzhan yang rtsom pa ci rigs pa mdzad de 'chad nyan la sogs pas bstan pa'i bya ba du ma mdzad/ 'phags pa rin po che hor yul la phebs dus gdan sa yang mdzad/ slar gong la phebs te rgyal po'i bla mchod mdzad de/ rgyal po'i pho brang dang nye bar dge 'dun gyi sde btsugs pa la sogs pa bstan pa'i bya ba rlabs po che du ma mdzad nas/ dgung lo zhe gnyis pa sa mo yos kyi lo me tog ra ba zhes bya bar zla ba gsum pa'i tshes gsum la zhi bar gshegs so/ /yang kha cig las/ 'phags pa dbus gtsang la phebs skabs rgya nag shing kun dang me tog ra ba'i gdan sa la slob dpon 'di bkod ces 'byung zhing / sku gshegs sa yang shing kun du gshegs zhes 'byung la/ kha cig las/ zla ba yang tha skar dang / tshes