[A:142a]las bshad/ yang stag tshang lo tswa bas mdzad pa'i gdung rabs las bla chen grags 'od dang / nyi lde ba gu shrI shes rab dpal dang / mi chen o bus dang gsum gyi gdan sa nas ti shrI grags 'od la zhu yig byung ba dang mthun par rgyal po la dharma pA la gshegs/ bdag nyid chen po sman rtser bzhugs pas deng sang bla ma 'phags pa'i gdan sa bu chen la gtad yod 'dug pa sogs nan gyis zhus pa dang / lhag par de'i dus su sa skya pa'i lcam zhig hor yul du phebs pa de g.yang la lhung nas grongs pa la 'ja' 'od dang ring bsrel la sogs pa ngo mtshar gyi ltas du ma byung bas/ rgyal po ngo mtshar skyes nas/ nga'i bla ma'i rus yin pa tsam gyis kyang chog par 'dug pas/ bzang po dpal tshol gsungs pa'i lung bud de sman rtse nas byon no zhes bshad de/ gang ltar yang de'i tshe mthu stobs kyi mnga' bdag sga a gnyan dam pas chos skyong la 'phrin las bcol/ rgyal po'i pho brang gi steng du lcags kyi bya rog chen po ri bo tsam babs te/ de'i spu 'gul ba tsam gyis sa phyogs thams cad g.yo ba dang / gnam kha'u'i rdo'i char pa babs pa sogs cho 'phrul sna tshogs bstan pas kyang myur ba'i grogs byas nas/ dgung lo so lnga pa la sman rtse nas gdan drangs te/ tshur lam sngon gyi rgyal po bong sna can gyi mkhar dang / kong jo'i yab rgya rje btsad po thang tha'i dzung rgyal po'i gnas brtan bcu drug dbyar gnas la spyan drangs pa'i sa/ lha sa'i jo bo'i sku yol bzhugs sa pho brang chen po kyin chang hU zhes pa dang / byang chub sems dpa' chos 'phags kyis rtag tu ngu