[A:144b]cing / khyad par dpal ldan sa skya pa'i dri ma med pa'i gdung brgyud rin po che zhes mtshan gyi dge legs tsam gyis kyang bstan pa rin po che gsal bar nus pa'i mkhas shing grub pa brnyes pa'i skyes bu dam pa/ nam mkha' dngas pa la rgyu skar gyi tshogs bkra ba lta bu zhig deng sang gi bar du rgyud mi 'chad par byon nas/ sangs rgyas kyi bstan pa nam langs pa la nyi ma shar ba ltar gsal bar gyur pa 'di ni/ bdag nyid chen po zhes mtshan yongs su grags pa'i skyes chen dam pa 'di kho na'i bka' drin las byung bar shes par bya'o/ /de rnams kyis lha rigs 'khon sa skya pa ste mtshan mchog gsum dang ldan pa'i gdung rabs byon tshul las/ sa skya spyi la dbang ba'i gdung rabs rin po che byon tshul bstan zin to/ /'dir smras pa/ bod yul thub pa'i rgyal tshab sa skya pa'i/ /bstan pa'i rgyun bzang mi nub skyong ba la/ /sprul pa'i gdung brgyud bye ba phrag brgya'i sgo/ /dang por 'byed mdzad bka' drin ches lhag pa'i/ /bzang po'i mtshan 'chang 'gro ba'i dpal mgon mchog /gang gi dri med rigs kyi rgya mtsho las/ /ngo mtshar chu phran mkhas grub gdung rigs tshogs/ /rgyun chad med par 'byon 'di e ma mtshar/ /bar skabs kyi tshigs su bcad pa'o// //spyi don gsum pa de las gyes pa'i bla brang rnam bzhi'i gdung rabs bshad pa la don bzhi ste/ gzhi thog bla brang pa'i gdung rabs bshad pa/ ri chen sgang bla brang pa'i gdung rabs bshad pa/ lha khang bla brang pa'i gdung rabs bshad pa/ dus mchod bla brang pa'i gdung rabs bshad pa'o/ /dang po la yang tshigs bcad kyi sgo