[A:147a]grags pa'i rnam 'grel la gsan sbyong mdzad pas tshegs med du phyin ci ma logs par mkhyen te/ mdor na sku gzhon nu la yab mes kyi chos thams cad thugs su chud pas/ snyan grags lha'i rol mo phyogs kun tu bsgrags/ de la brten nas hor gyi rgyal po ge gan bya bas gdan 'dren gyi gser yig pa byung ste/ dgung lo bcu gcig pa sa pho byi lo la gong la phebs nas sa'i steng na 'gran zla med cing / rgya mtsho'i mtha' klas pa'i sa chen po'i bdag po mi'i dbang po chen po A yu par ta'i pho brang chen por chag phebs te/ theg pa gsum gyi gtam gyis tshim par byas te/ rgyal blon btsun mo sras dang bcas pa thams cad kyis zhabs la gtugs shing / zab pa dang rgya che ba'i chos kyi sgo du ma stsal bas/ bla ma 'di nyid la mi phyed pa'i dad pa thob ste bstan pa'i bdag po chen por mnga' gsol ba la brten/ bdag nyid chen po 'dis kyang bstan pa rin po che'i 'khur bzhes te/ sngar chos rje khu dbon gyi gdul byar gyur te/ smin par mdzad pa rnams kyang shin tu dad cing / rang bzhin gyis mdzes pa la rgyan gyis mdzes par byas pa lta bur gyur/ chos rje khu dbon gyi gdul byar ma gyur pa'i skad rigs ma gcig pa du ma la theg pa chen po'i chos kyi char chen po phab ste shar phyogs nyi 'og gi rgyal khams thams cad theg pa chen po'i chos kyis khyab par mdzad ces grags so/ /de nas dgung lo nyer bzhi pa chu pho khyi'i lo slar yang kha ba can gyi sems can rnams la thugs brtse ba chen pos dgongs pa dang / bdag nyid kyis sngar ma gsan pa'i chos