[A:146b]bzang / /de dang dpon mo buddha gan gyi sras/ /zhes bdag nyid chen po'i sras dbang bsod nams bzang po'i btsun mor bshad pa dang / gzhan yang gdung rabs tshad ldan thams cad las kyang / bdag nyid chen po'i btsun mo sman rtse ma dang / gzhan lung gis phud pa'i btsun mo drug las ma bzhes bar bshad pa dang 'gal bas cung zad mi 'thad dam snyam mo/ /bdag nyid chen po'i btsun mo gsum pa lung gis phud pa'i gnyis pa ni/ yul mang mkhar sog spe/ ming ma gcig ngang mor grags pa ste 'di ni dpon chen ag glen gyi gong du byon nas/ bdag nyid chen po dang bar lam du mjal/ hor rgyal pos bdag nyid chen po la gdung brgyud spel dgos pa'i lung phebs pa sogs kyi lo rgyus rnams go ba dang / dpon chen shin tu mnyes nas ma gcig ngang mo bla ma'i btsun mor phul bar grags pa de nyid yin te/ de la sras bla chen kun dga' blo gros rgyal mtshan dpal bzang po yab dgung lo so brgyad pa sa mo phag gi lo lha khang bla brang du 'khrungs te/ gzhon nu nas kun gyi yid du 'ong ba/ sku gsung thugs kyi rtsal stobs che zhing spobs pa phun sum tshogs pa/ bkur 'os kun la gus pa dang zhe sar byed pa/ mkhyen rab dang brtse ba chen po zhig tu gyur nas/ thog mar klog yig la sogs pa bslabs pas tshegs med du byang chub par mkhyen/ de nas dges pa rdo rje'i rgyud brtag gnyis la thugs gnyer mdzad nas dgung lo dgu pa'i dus thugs las gsungs pas kun gyi ngo mtshar du 'dzin pa byung zhing / de nas tshad ma rigs pa'i bstan bcos kyi gtso bo dpal chos kyi