[A:150a]rabs las/ sku mched 'di gsum gyi sngon du sras gcig 'khrungs pa gzhon nu la gshegs zhes bshad pa ltar na sras bzhi byung bar yang mngon no/ /'di rnams kyi gcung gu shrI nam mkha' rgyal mtshan du grags pa 'di yab bdag nyid chen po gshegs pa'i lo 'khrungs pa yin zhes bla ma dam pa'i dngos slob shes rab rdo rjes mdzad pa'i gdung rabs las 'byung yang / gdung rabs phal che ba las bshad pa ltar yongs su grags pa la 'di nyid bla ma dam pa bsod nams rgyal mtshan dang dgung rtags gcig tu bshad pa dang / khyad par du bdag nyid chen po'i sras rnams bdag nyid chen po rang gi dgung lo lnga bcu nga gcig pa yan la rdzogs nas nga gnyis pa la bsnyen rdzogs mdzad par yongs la grags pa yin cing / bdag nyid chen po gshegs pa'i lo ni drug cu re gsum pa yin pas/ de dus sras 'khrungs na sras yum gyi khong du lo bcu lhag tsam bzhugs pa'am/ yang na bdag nyid chen pos bsnyen rdzogs mdzad pa'i rjes su slar yang gdung spel mdzad par khas len dgos 'byung bas/ gong du bshad pa nyid dag gam snyam mo/ /'di la mus srad pas gdung rabs su yab gshegs pa'i lo yin zer te brtag chu pho byi bar byas na bla ma dam pa dang dgung rtags gcig tu yong gsung pa tsam las ma gsungs la/
kun dga' rin chen/
gang ltar yang bdag nyid chen po'i sras mkhas btsun nam mkha' legs pa'i blo gros rgyal mtshan nam/ gzhi thog pa mkhas btsun chen por yang grags pa de'i sta ste ngam ring gi yul nas pha ming khang gsar ba bya ba cig gi bu sring