[A:173b]dang / bsnyen pa'i rim pa rnams phyag gis phreng ba 'dzin pa'i shugs med bzhin du/ drung na gnas pa rnams phreng ba'i sne mo dang grangs 'dzin du bcug nas yongs su rdzogs par mdzad/ de nas bskyed rdzogs kyi nyams len thun mong ma yin pa thugs rgyud la 'byongs pa'i rnal 'byor pa rnams ni 'da' kha ma la babs pa na/ 'chi kha'i 'od gsal sna tshogs 'char bas gsal btab cing dran blangs nas/ lhan cig skyes pa'i ye shes rang rig cing 'gyur ba med pa'i bde ba'i ye shes khyad par can/ lha dang mi'i bde ba'i bcu drug gi char yang mi phod pa'i bde ba chen po rnam par mi rtog pa sems rgyud du 'khrungs nas/ sngar 'dris kyi mi dang 'phrad pa ltar 'od gsal ma bu ngo 'phrod de ji ltar chu la chu bzhag pa dang / mar la mar bzhag pa ltar/ dngos po kun dbyer med bde ba chen por ro gcig tu 'dres pa'i zung 'jug rdo rje 'chang gi skur mngon par byang chub par 'gyur zhes mdo rgyud mang po nas gsungs pa de nyid bdag nyid chen po 'di la 'khrungs te/ de yang skabs der drung na gnas pa rnams kyis gzims mal cung zhig 'chos par brtsams pa na/ chos rje'i zhal nas/ 'di kha rang la bzhag pas yong ba 'dug 'di 'dra'i bde ba mi 'gyur ba'i bde ba/ stong pa'i bde ba/ 'dzag med kyi bde ba zhes sogs dang / rdo rje'i tshig thig le stong pa/ 'gyur med drug dbu ma'i thig le/ stong pa nyid kyi thig le zhes sogs brda'i tshig mang po gsungs shing / de nas sa sros kyi dus su drung na gnas pa kun la khyed rnams re zhig gzhan du song gsungs pas/ gzhan