[A:194a]bstan la thub dbang ltar/ /rab grags kun gyi 'gran bral de la 'dud/ /gzhan yang mthu stobs rdzu 'phrul nus pa'i gter/ /ngo mtshar rnam thar gang la bsams gyur kyang / /phan tshun 'gran pa bzhin du rim byon pa/ /kun la gsol ba 'debs so byin gyis rlobs/ /bar skabs kyi tshigs su bcad pa'o// //spyi don gsum pa lha khang bla brang pa'i gdung rabs bshad pa la yang / tshigs bcad kyi sgo nas mdor bstan pa dang / de'i don rgyas par bshad pa gnyis las/ dang po ni/ rje btsun sa skya pa'i gdung rabs ya rabs kha rgyan las/ rin chen sgang pa'i gdung rabs byon tshul bshad zin ma thag pa'i mjug tu/ bdag nyid chen po'i btsun mo ra lung ma/ /kun dga' nam mkha'i rgyal mtshan zhes bya'i sras/ /ti shrI kun dga' legs 'byung zhes bya dang / /gcung po ti shrI kun dga' rgyal mtshan gnyis/ /kun rgyal btsun mo stag sde kha phyar ma/ /dpal ldan bzang mo'i sras ni chos rgyal mtshan/ /btsun mo gnyis pa stag sde ra lung ma/ /bsod nams dpal la ta dben blo rgyal 'khrungs/ /ta dben chos rgyal btsun mo chu mdo ma/ /rgyal mo mtsho sras theg chen chos rje yin/ /btsun mo gnyis pa nyang stod sras skyabs la/ /dharmA dhwa dza rdo rje rin chen gnyis/ /btsun mo gsum pa dpon mo sras pa la/ /slob dpon chen po bsod nams bkra shis 'khrungs/ /bsod bkra'i btsun mo stag sde ra lung ma/ /nam pa'i sras po bde legs bkra shis yin/ /bde legs bkra shis btsun mo gcig bzhes pa/ /gang de'i sras po bsod nams