[A:193b]mtshan nyid kyi rnam par thar pa rags pa tsam zhig rje de nyid kyi slob brgyud 'dzin cing snyan brgyud gdams pa'i mnga' bdag tshar pa chos rje blo gsal rgya mtsho zhes bya ba'i grub pa'i dbang phyug chen po des mdzad pa'i rnam thar las logs su blangs nas bris pa yin la/ rgyas pa ni rnam thar de nyid dang / gzhan yang bdag chen nyid kyi dngos slob du mas rnam par thar pa mang po zhig 'byung bas de dag tu bltas la khong du chud par bya'o/
grags pa rgyal mtshan/
/yang bla chen kun dga' rgyal mtshan gyi sras/ mthu stobs dbang phyug bsod nams rgyal mtshan zhes bya bas yul ldan ma/ ming ma gcig kun dga' 'bum bya ba khab tu bzhes pa la/ sras slob dpon chen po grags pa rgyal mtshan zhes bya ba chu mo glang la 'khrungs shing / 'dis kyang khams phyogs su phebs nas bstan pa'i bya ba rgya chen po bsgrubs nas/ dgung lo zhe gnyis pa shing pho rta'i lo la sku gshegs so/ /de rnams kyis lha rigs 'khon sa skya pa ste mtshan mchog gsum dang ldan pa'i gdung rabs byon tshul las/ gdan sa chen po'i bla brang so sor dbang bsgyur ba'i gdung rabs kyi nang nas/ rin chen sgang bla brang ba'i gdung rabs rin po che byon tshul legs par bstan zin to// //
'dir smras pa/ rin chen gter gyis bltams pa'i sa 'dzin rtser/ /rin chen khang brtsegs rmad byung nyams dga' bar/ /rin chen 'phreng pa bzhin du legs byon pa'i/ /rin chen sgang pa'i gdung rabs bsngags par 'os/ /khyad par byang chub sems dpa' zhi ba 'tsho'i/ /rnam 'phrul 'gro mgon bsod nams rgyal mtshan zhes/ /snyigs dus thub pa'i