[A:195a]gshegs zhes kyang 'byung bas brtag par bya'o/ /bla ma de'i gcung
ti shrI kun dga' rgyal mtshan/
ti shrI kun dga' rgyal mtshan dpal bzang po ni yab dgung lo zhe dgu pa lcags pho khyi'i lo la shal zug bya bar sku 'khrungs te gzhon nu nas yab chos rnams la sbyangs pa phul du phyin pa mdzad cing / khyad par stag thog pa tshul khrims dpal la sogs pa mkhas pa mang du bsten nas/ rnam 'grel sogs rigs pa'i gzhung lugs rnams la sbyangs pas shin tu mkhas shing smra ba'i mchog tu grags te/ gdan sa chen por dbyar chos dgun chos ma chag par mdzad pas snyan pa'i grags pas sa'i steng ma lus pa khyab pa la brten nas/ gong nas rgyal po chen po'i chang gu'i gung gu shrI'i mtshan dang / gser gyi dam kha sogs phul zhing / phyis gong nas gdan 'dren gser yig pa byung nas dgung lo nyer gnyis pa'i dus gong du phebs te/ lo nyi shu rtsa bdun gyi bar du rgyal po chen po'i ti shrI mdzad pas/ rgyal pos kyang thub pa'i rgyal tshab chen por mnga' gsol zhing / bdag nyid chen po 'dis rgyal khams chen po der bstan pa'i bya ba 'chad rtsod rtsom gsum dar rgyas su mdzad de/ bde bar gshegs pa'i bstan pa nyin mo ltar gsal bar mdzad pa dang / gzhan yang sa phyogs der bar skabs bar skabs su phyi'i rgya mtsho chen po lud nas gnod pa chen po yongs kyi yod pa la/ bla ma 'dis gtor chen dang bla gos bsdebs pa la sogs mdzad pas rgya mtsho phyir log pa dang / yang ngo log gi dmag gi rnam 'phrul mang pos rdzu 'phrul gyis rta dmag gi mtshon cha 'phen pa sogs kyis rang phyogs