[A:224a]dpal bzang po zhes grags pa des btsun mo gsum khab tu bzhes pa las/ shangs mthong smon pa ma gcig bgres gzhon gnyis kyi/ bgres pa la sras mo gcig dang / chung ba ma gcig rgyal mo bya ba la/ sras nam mkha' rin chen rgyal mtshan dpal bzang po zhes bya ba/ yab dgung lo bcu dgu pa chu mo bya'i lo ltas bzang po dang bcas sku bltams te/ skyes stobs kyi mkhyen rab dang sbyor byung gi brtson 'grus gnyis ka phun sum tshogs pas/ gzhon nu nyid nas kye rdor dang rdo rje phur pa'i thugs dam/ sngags ring mang po'i bzlas brjod sogs la shin tu brtson zhing / rtsa ba'i rgyud brtag pa gnyis pa la gsan sbyong phul du phyin pa mdzad de/ byis pa'i spyod pa cung zad kyang mi mnga' bar/ dgung lo bco lnga'i dus su gcung nam mkha' bkra shis rgyal mtshan dang sku mched lhan cig tu gdan sa chen por nyi ma sum sbrel du bshad pa rgyas pa dga' ston rgya chen po dang bcas pa mdzad pas/ gdan sa'i skye bo thams cad yi rangs te gdung brgyud kyis chos gsungs pa la 'di las lhag pa dus phyis kyi rgan rnams kyis kyang mi dran zer ba la sogs pa ngo mtshar mchog tu 'dzin pa byung bar grags pa yin la/
nam mkha' bkra shis/
bdag nyid chen po 'dis gcung nam mkha' bkra shis rgyal mtshan dpal bzang po zhes bya ba ni/ dbang nam mkha' rgyal mtshan dpal bzang po'i btsun mo gsum pa rnam rgyal gling pa dpal 'byor bzang mo la/ yab dgung lo nyer bzhi pa sa pho stag gi lo 'khrungs te/ 'khrungs ma thag nas byis pa'i spyod pa thams cad dang bral zhing thugs la khro ba skad cig