[A:277a]gi char chen po phab pa dang / 'ja' 'od kyi gur phub pa la sogs pa ngo mtshar ba'i ltas du ma dang bcas te bkra shis dang byin rlabs kyi gzi 'od 'bar bar bzhugs te/ slar yang srid pa ji srid pa de sring du 'jam pa'i dbyangs kyi rnam sprul rim par byon te/ gdul bya gang la ci 'dul gyi rnam par bstan nas phrin las rgyun mi chad cing lhun gyis grub pa'i rten 'brel phun sum tshogs pa 'grig pa yin no/ /de ltar sku gdung rin po che de nyid mi lo nyi shu'i bar du ril por bzhugs shing / de nas sngon 'jam pa'i dbyangs sku mched la sngags 'chang nyid kyi gsung las/ bla ma dge ba'i bshes gnyen gyi pur ril po yun ring 'jog pa 'di legs rgyu med de/ ma 'ongs pa bstan pa nyams pa'i dus su bla ma'i pur srang bar gyi khyi sogs kyi zas su 'gro ba yang srid pas/ nged kyi rus bu 'di dang tsho ni myur du bzhu ba gal che'o zhes yang yang gsung ba zhig yod pa gdung sras sku mched gnyis kyi thugs dkyil du bcangs nas/ shing pho 'brug gi lo shar ba na sku gdung rin po che bzhu la phul te/ gdung tsha rnams dngul gdung rin po che de nyid du bzhugs su gsol zhing / de dang dus mtshungs par sems dpa' chen po sngags 'chang grags pa blo gros rgyal mtshan dpal bzang pos bdag nyid chen po'i dgongs pa rdzogs thabs su rigs 'dzin bla ma brgyud pa'i gtsug lag khang gsar bzhengs mdzad pa de'i rten gyi gtso bo la sngags 'chang chos kyi rgyal po'i nang rten dngul gdung yid bzhin gyi nor bu de nyid spyan drangs te/ deng sang gi bar du 'gro ba rnams kyi mchod pa'i