[A:298b]mchog tu bzang / khyed khri thog pa sku mched gnyis po tshe ring po 'ong zhing / 'phrin las kyang shin tu che bas bstan pa dang sems can la phan pa rgya chen po 'byung ba'i rten 'brel du 'dug pas de'i dga' ston gyis gsungs nas/ sku mched gnyis la gos chen gyi sku bem bzang po re re stsal ba'i rje nyid la gnang ba de ni gos mdog dmar po sprin ris ma bar mtshams la nor bu cha bdun gyi ri mo byas pa zhig 'dug pa shin tu rnying par song 'dug kyang / dus phyis kyang nyid kyi sku la yang yang bzhes nas gong gi lo rgyus rnams gsungs te/ gos bem 'di rnying kyang gsar pa brgya bas dga' ba yin zhes gsung ba thos shing / gzhan yang lha dang brgyud pa'i bla ma du mas zhal bstan cing byin gyis brlabs pa'i tshul sogs ni/ rje nyid kyis bde mchog pho brang du dges pa rdo rje'i gzhi bsnyen la bzhugs pa'i dus su/ tho rangs kyi cha zhig la mnal lam gyi tshul gyis mdun gyi nam mkhar 'ja' 'od kyi gur khang 'khyil ba'i khrod na/ sa skya pa rje btsun dkar po rnam gsum shin tu gsal bar bzhugs pa'i sku mdun na rin po che'i snod shing 'bras kyis bkang ba zhig dang bcas 'dug pa gzigs pas dad shugs chen pos phyag mang du btsal ba'i snang ba byung gsungs shing / gzhan yang dus der nam mkha' thams cad sprin dkar po zhig gis khyab pa'i ngos la tshe dpag med dkar po'i sku brnyan shin tu gsal ba zhig kyang mngon sum du mthong ba byung kyang gsungs so/ /de ltar kye rdo rje'i gsung bsnyen mdzad pa'i rjes de ma thag par/ gur gyi mgon po'i bsgom bzlas zhag bdun pa zhig mdzad pa'i tho rangs