[A:298a]po'i sgo nas gang yang 'jam dar gyi tshul du skyong ba la mchog tu mkhas pas/ dmu rgod su gang gis kyang 'dul bar ma nus pa rnams kyang rang gi ngang gis 'dul bar mdzad cing / mdor na sngags 'chang chos kyi rgyal po ngag dbang kun dga' rin chen gyis dpal sa skya'i sde bstan pa gdung brgyud dang bcas pa'i bstan pa'i me ro gso bar mdzad pa'i rgyun de nyid mi nyams shing yar ldan du skyong ba la/ bdag nyid chen po 'di bas lhag pa gzhan su yang ma byung bas/ des na sngags 'chang bstan pa'i gsal byed chen po de nyid kyi thugs kyi sras mchog kun gyi gtsug rgyan dam par gyur pa yin no/ /de lta bu'i skyes bu chen po 'di nyid la bla ma dang lhag pa'i lha du mas byin gyis brlabs shing lung bstan brnyes pa'i tshul sogs ni gong gi rnam thar bstod pa'i tshigs bcad kyi 'phros las/ kye rdo rje yi dkyil 'khor bsgrub pa'i tshe/ /dpal ldan bla mas lung bstan brnyes la 'dud/ /ces sogs te de yang rje nyid sku phra mo'i dus rje btsun gcen dang lhan cig pas sngags 'chang chen po'i zhabs phyir bzhugs nas/ lha khang chen mo'i yang steng theg chen pho brang du dges pa rdo rje'i dkyil 'khor rdul tshon ma'i sgrub mchod nyi ma du ma zhig mdzad pa'i tshe/ tho rangs kyi cha zhig la lam 'bras brgyud pa'i rten gtso rje sa chen gyi sku 'dra rin po che'i zhal dkyil la 'od dkar po zla ba shar ba 'dra ba zhig yun ring po'i bar du byung ba dang / sngags 'chang chos kyi rgyal po nyid shin tu dges pa'i gsung gis sa chen gyi sku'i zhal dkyil la 'od dkar po byung ba de rten 'brel