[A:209]མཁའ་འགྲོ་རྩ་འདབ་ཀྱི་གྲངས་དང་མཉམ་པ་རིགས་ཀྱི་ཕྱག་མཚན་ཡུ་བའི་གྲི་གུག་ཅན། བྱིན་བརླབས་དབང་བཞིའི་ཚུལ་དུ་བསྐུར་བ་འཇུག་པ་ནས་བཟུང༌། མིག་དར་བཞི། མཐར་སིནྡྷུ་རའི་དཀྱིལ་འཁོར་ནས་གཡས་པའི་སྲིན་ལག་གིས་བླངས། གཡོན་པའི་སྲིན་ལག་ལ་བསྐུས་པ་སློབ་མའི་གནས་སོ་སོར་བྱུགས་བསྟིམ། གསར་མའི་མ་རྒྱུད་ཀྱི་དབང་སྔོན་དུ་མ་སོང་བར་མི་བསྐུར། དྲུག་པ། བདེ་མཆོག་དཀར་པོ་ཚེ་བུམ་གཉིས་འཛིན་པ་སྐྱིལ་ཀྲུང་ཅན་ལ་ཕག་མོ་དམར་མོ་ཚེས་གང་བའི་ཐོད་པ་གཉིས་འཛིན་པས་འཁྱུད་པ། འབྲང་རྒྱས་མགོ་བོར་འཇོག་ཅིང་ཚེ་རིལ་ཟ། ཀ་ལིའི་ཚེ་ཆང་ཐུང་བ་སོགས། བདུན་པ། སྒྲོལ་མ་དཀར་མོ་ཐུགས་ཀར་ཡེ་ཤེས་སེམས་དཔའ་ཡོད་པ། སྔགས་ཡེ་གེ་བཅུ་པ་དང༌། ཨོཾ་སརྦ་ལོ་ཀ་ཨཱ་ཀརྵ་ཡ་ཛཿསྭཱཧཱ། ཚེ་ཆང་ཚེ་རིལ་ཟ་འཐུང༌། ཡང་གཏོར་མ་ནས་ཅུང་ཟད་ཟ་ཞིང་བསྟིམ་པ་ཡིན། བསྐུར་ཆོག་ན་མི་གསལ་བ་ཞལ་ཤེས་དགོས་པ་རྣམས་འདིར་ཞིབ་ཏུ་བྲིས་སོ། །དེ་རྣམས་ཀྱི་སྨིན་གྲོལ་ལེགས་པར་ཐོབ་པའི་བརྒྱུད་པ་ནི། རྒྱལ་བ་རྡོ་རྗེ་འཆང༌། རྗེ་བཙུན་འཇམ་པའི་དབྱངས། གྲུབ་ཆེན་དཔའ་བོ་རྡོ་རྗེ། རྒྱལ་བ་གཉིས་པ་བློ་བཟང་གྲགས་པ། རྗེ་ཆོས་བཟང་དཔལ་བ། ཐམས་ཅད་མཁྱེན་པ་དགེ་འདུན་གྲུབ། པཎ་ཆེན་ཡེ་ཤེས་རྩེ་མོ། རྗེ་ཆོས་ལྡན་པ། མར་སྟོན་སེམས་དཔའ་ཆེན་པོ་ཚུལ་ཁྲིམས་རིན་ཆེན། རྡོ་རྗེ་འཆང་སྔགས་རམ་པ་དགེ་འདུན་ཀུན་དགའ་བཀྲ་ཤིས། ཐམས་ཅད་མཁྱེན་པ་བསོད་ནམས་རྒྱ་མཚོ། བྲག་དགོན་སྤྱན་སྔ་གཞོན་ནུ་ཆོས་དཔལ་བཟང་པོ། རྡོ་རྗེ་འཆང་ཕ་བོང་ཁ་པ་དཔལ་འབྱོར་ལྷུན་གྲུབ། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ། ཐམས་ཅད་མཁྱེན་གཟིགས་ངག་དབང་བློ་བཟང་རྒྱ་མཚོ། དེས་བདག་ལ་བཀའ་དྲིན་དུ་བསྩལ་ཏོ། ༈ ཁྲོ་བོའི་རྒྱལ་པོ་མི་