[A:༢༩༠]ལ། །འདི་ན་ཕལ་ཆེར་རྨོངས་པར་མཐོང་ནས་འདིར། །མང་དུ་ཐོས་ཤིང་མཐོང་ནས་གོམས་པ་དང་། །མན་ངག་དབང་གིས་དཔལ་ལྡན་ཀུན་དགའ་ཡི། །རྒྱལ་མཚན་འདི་ན་འགའ་ཙམ་འཆད་པ་ལ། །མཁས་པ་རྣམས་ཀྱིས་དགའ་བ་བསྐྱེད་དེ་ཉོན། །ཞེས་གསུངས་ཤིང་། །བསྟོད་པ་མཛད་པས་ཀྱང་། །དབྱངས་ཅན་ལང་ཚོ་ཟག་ཟད་ཡེ་ཤེས་ཀྱི། །རྩེ་དགས་ཐུགས་ཡིད་གཅུགས་པའི་སེང་གེ་བརྩེན། །ཚིག་རྒྱན་བལ་ལ་ཀི་སྟེ་ལྷའི་རོལ་སྒྲས། །ཡིད་བསྒྱུར་ཁམས་གསུམ་དབུགས་འབྱིན་སྙན་ངག་མཁན། །ཞེས་གསུངས་པ་ཡིན་ནོ། །
དེ་བཞིན་དུ་མངོན་བརྗོད་ཀྱི་རིམ་པ་ཡང་བོད་དུ་ཡོངས་སུ་གྲགས་པའི་སྡེ་སྣོད་གསུམ་དང་རྒྱུད་སྡེ་བཞིར་གསུངས་པའི་མིང་གི་ཚོགས་མཐའ་ཡས་པ་དང་། དེ་དག་ཀྱང་འདོད་རྒྱལ་དང་། རྗེས་གྲུབ་འདྲ་འབྲེལ་སོགས་སོ་སོར་ཕྱེ་ཞིང་། བཀས་བཅད་ཐོག་མཐའ་བར་གསུམ་དུ་གྲགས་པ་ལྟར། བརྡ་གསར་རྙིང་གི་བྱེ་བྲག་ཐམས་ཅད་ལེགས་པར་ཕྱེད་ཅིང་། ལྷག་པར་མཁས་པ་ཆེན་པོ་དགེ་འདུན་དཔལ་ལས་མངོན་བརྗོད་ཀྱི་བསྟན་བཅོས་ལས་ཡི་གེ་རེ་རེའི་མངོན་བརྗོད་གསན་ཅིང་བསྒྱུར། ཨ་མ་ར་ཀོ་ཥ་དང་། སྣ་ཚོགས་གསལ་བའི་འགྲེལ་པ་དང་བཅས་པ་གསན་ཅིང་། དེ་དག་སྡེ་གསུམ་མམ་བཞིར་འདུས་ཤིང་། རྟགས་གསུམ་གྱི་རྣམ་དབྱེ་ལེགས་པར་ཕྱེད་པའི་སྒོ་ནས་རིག་གནས་འདིའི་སྲོལ་ཆེར་བཏོད་པ་ཡིན་ཏེ། ཉིད་ཀྱི་གསུང་ལས། བྱང་ཕྱོགས་འདི་ན་ཚིག་ལ་མཁས་པ་མེད། །ལེགས་པར་ཤེས་ནས་འཆད་པ་ཁོ་བོ་ཙམ། །རྟགས་ཀྱི་དབྱེ་བ་ཕལ་ཆེར་འདིར་མི་འཇུག །འོན་ཀྱང་བོད་ལ་མཁོ་བ་ཙམ་ཞིག་བསྡུ། །ཞེས་གསུངས་ཤིང་། བསྟོད་པ་མཛད་པས་ཀྱང་། ཏིདྲ་སུཔྲ་མཐའ་དང་རྟགས་ཀྱི་རྣམ་དབྱེ་སོགས། །སོ་སོར་མ་འདྲེས་སྣ་ཚོགས་མངོན་བརྗོད་དག །འཆད་མཁས་མཐའ་ཡས་མིང་ལ་