[A:༦༣༥]རྣམ་པར་ཐར་པ་ངོ་མཚར་ནོར་བུའི་མགུལ་རྒྱན་རྣམས་ལའང་རྗེ་བླ་མ་ཞལ་བཞུགས་དུས་ཟིན་བྲིས་ངེས་སྦྱར་མེད་པའི་སྐྱོན་གྱིས་ལོ་ཚིགས་གལ་ཆེ་བ་རགས་པ་ཙམ་ལས་ཞིབ་ཆ་མ་མཆིས་ཤིང༌། མཛད་པ་འགངས་ཆེ་བ་རྣམས་བསྡེབས་མཚུངས་སུ་འདུག་པ་ཞལ་སློབ་ཀྱི་རྣམ་ཐར་དང་སྒོ་བསྟུན་པའི་ལོ་ཟླ་སོགས་ཅུང་ཟད་གཏན་ཚིགས་ཀྱིས་གཞལ་ནུས་ཀྱང་མཐའ་དག་རྟོགས་པར་དཀའ་བས་གསོལ་འདེབས་ཚིགས་བཅད་མ་རྩ་བར་བཟུང༌། འགྲེལ་པ་དང་འཇམ་དབྱངས་དགའ་བའི་བཤེས་གཉེན་གྱིས་མཛད་པ་གཉིས་ལ་འཁྲུལ་སྐྱོང་ངོས་ཟིན་པ་ཐོར་བུ་བྱུང་བ་རྣམས་ལ་དག་སྦྱོར་བྱས། གོ་རིམ་ཕྱོགས་ཙམ་ལས་ངེས་སྦྱར་མ་ཐུབ་རུང་དོན་གྱི་ཆ་ལ་དཔྱད་གང་བཟོད་ཀྱི་ལུགས་བགྱིས་པར་སླད་ནས་ཀྱང་མཁས་པ་རྣམས་ཀྱིས་དག་ཐེར་དང་སྣོན་འཕྲི་མཛད་འཚལ་ལོ། །རྒྱལ་ཡུམ་ཡེ་ཤེས་མཁའ་འགྲོས་རྗེས་བཟུང་ས་དྲུག་དཀའ་བ་མེད་བགྲོད་ནས། །བརྟུལ་ཞུགས་སྤྱོད་པས་ལོག་ལམ་འཕྱན་ཀུན་མངོན་མཐོ་ངེས་ལེགས་གནས་བཀོད་དེ། །བཅུ་གསུམ་རྡོ་རྗེ་འཛིན་པའི་སར་གཤེགས་རྣལ་འབྱོར་དབང་ཕྱུག་ཆོས་སྐྱོང་ཞབས། །ཨ་ཧོ་ངུར་སྨྲིག་གོས་ཀྱིས་ཉེར་ཀླུབས་རིགས་ཀུན་བདག་པོ་ཚར་པ་རྗེ། །འགྲོ་སྣང་རྫིང་བུ་གངྒཱའི་ཀླུང་རྡུལ་སྙེད། །སྣ་ཚོགས་སྒྱུ་དྲའི་ཟླ་གཟུགས་འཆར་བའི་ཚད། །བསྐལ་བརྒྱར་འཚོལ་བའི་རྩེ་གཅིག་ཏིང་འཛིན་མཁན། །མཁའ་མཐའ་མ་རྙེད་ལྡོག་པའི་འདབ་ཆགས་བཞིན། །བཅུ་གསུམ་རྣམ་པར་སྤྲུལ་པའི་ཟློས་གར་གཏམ། །གྱ་ཚོམ་སྨྲ་མིན་ལུང་རིགས་ངེས་སྟེར་ནོར། །གྲངས་མེད་སྐྱེ་བར་བསྒྲུབས་པའི་ལེགས་བྱས་ཀྱི། །ཚུལ་ཟོང་དེས་ཁུགས་ཚུལ་ལ་གཅིག་ཏུ་རངས། །ཐོས་བསམ་ཆ་བསགས་ཟླ་དཀྱིལ་དམན་པའི་ཟོལ། །གཞན་ནོར་འཕེལ་དང་འགྲིབ་པ་ལྟར་སྦྱོར་ཡང༌། །དཔག་