[A:༦༣༦]དཀའི་ཡོན་ཏན་རི་བོང་སྣང་བརྙན་དེ། །མངོན་སུམ་གསལ་བར་འཆར་ལ་གང་གིས་བསྙོན། །སྙན་བརྒྱུད་རིང་ལུགས་དཔྱིད་ཀྱི་དགའ་སྟོན་ཚོགས། །ཆད་མེད་འབོད་པའི་རྟོགས་བརྗོད་གཞན་གསོས་གླུ། །བློ་གསལ་རྣ་བའི་བཅུད་དུ་སྲིད་མཐའི་བར། །ཆེས་དངར་ཕང་འགྲོའི་སྒྲ་བཞིན་སྙན་པར་ཤོག །ཆེད་དུ་སྒོ་གསུམ་འབད་རྣམས་ཟུང་འཇུག་སྐུ། །མངོན་གྱུར་དེ་སྲིད་ཚད་མ་བཞི་ལྡན་ཆོས། །སྟོན་དང་ཉེར་མཇལ་ཐོས་བསམ་སྒོམ་པ་ཡི། །བཟང་པོའི་སྐལ་བ་ཅན་དུ་འགྱུར་བར་ཤོག །གསུང་ངག་གསེར་ཆོས་རྡོ་རྗེའི་ཆོས་སྐྱོང་གིས། །ཟབ་དོན་སློབ་མར་བཤད་བྱ་གདམས་པའི་ཆར། །སྣོད་ལྡན་གདུལ་བྱའི་འཛིན་མར་རབ་བརླན་ཏེ། །བཤད་སྒྲུབ་སྙེ་མ་སྲིད་མཐར་གཡུར་ཟ་ཤོག །དེ་ཡང་ཚར་ཆེན་ཆོས་ཀྱི་རྒྱལ་པོའི་རྟོགས་བརྗོད་བྱ་གཤོང་མཁན་ཆེན་འཇམ་དབྱངས་དགའ་བའི་བཤེས་གཉེན་གྱིས་མཛད་པ་དེར་འཁྲུལ་གཞི་ཁ་ཡར་ཡོད་གྲགས་དང༌། ས་སྤྱོད་འདར་བ་རིན་ཆེན་དཔལ་བཟང་ཁུ་དབོན་གྱིས་སྦྱར་བའི་གསོལ་འདེབས་རྩ་འགྲེལ་ཁུངས་བཙུན་ཡང་ཁྱབ་ཆེ་བ་ཞིག་མི་སྣང་བས་བསྒྲིག་མདུན་ཡོད་ངོས་དྲིན་ཅན་བླ་མ་དཔལ་ལྡན་རྡོ་རྗེ་སེམས་དཔའ་དངོས་བཀའ་འགྱུར་བ་ཆེན་པོ་དང་འདྲེན་མཆོག་དམ་པ་མཁན་ཆེན་ཞ་ལུ་བ་གཉིས་ཀྱི་བཀའི་ཁུར་ལྕི་བའི་སྟེང༌། བདག་ཆེན་རྡོ་རྗེ་འཆང་ཡབ་སྲས་བརྒྱུད་པ་དང་བཅས་པ་ལ་མི་ཕྱེད་པའི་དད་པ་ཐོབ་པའི་བསྟན་པའི་སྦྱིན་བདག་པཱ་ཎི། ཀ་ཙན། སྭ་ར་སྭསྟི་བྱ་ཀ་ར་ཎ་སོགས་བརྡ་སྤྲོད་པའི་གཙུག་ལག་རྒྱ་མཚོའི་མཐར་སོན་ཞིང༌། སྡེབ་སྦྱོར། རྩིས་དཀར་ནག་གིས་མཚོན་པའི་རིག་བྱེད་དུ་མ་ལ་བློ་གྲོས་ཀྱི་སྣང་བ་རྒྱས་པ་འདར་བ་ངག་དབང་ཕུན་ཚོགས་ལྷུན་གྲུབ་ཀྱིས་ལོ་རྒྱུས་ཁ་འཐོར་རྣམས་བསྡུ་བ་སོགས་འབད་པ་ཆེན་པོས་བསྐུལ་བ་དང༌། རབ་འབྱམས་རྒྱུད་སྡེའི་བང་མཛོད་བཅོ་བརྒྱད་ཆོས་རྗེ་