[B:10a] ཀྱི་བཤད་པ་སོང་བའི་མཚམས་སུ་ནཱ་རོ་ཆོས་དྲུག་གི་ཁྲིད་གནང་བར་འདུག་པས་གསན་པར་བཞེད་པ་ན། དབང་མ་ཐོབ་པས་ཆོས་རྗེ་གུང་སྣང་བ་ལ། བདེ་མཆོག་ལུས་དཀྱིལ་གྱི་དབང་ཞུས་ཏེ། ནཱ་རོ་ཆོས་དྲུག་ཇི་ལྟར་གནང་བའི་གསུང་ལ་ཟིན་བྲིས་ཀྱང་མཛད། དེ་ཐོན་ནས་རྩ་ཤེའི་རབ་བྱེད་ཐ་མ་དང་། སློབ་དཔོན་དཔའ་བོས་མཛད་པའི་སངས་རྒྱས་ཀྱི་སྐྱེས་རབས། ཚད་མའི་ལམ་རིམ། བྱང་ཆུབ་ལྟུང་བཤགས་རྣམས་ཀྱང་གསན། འདུལ་བ་འཛིན་པ་གྲགས་པ་རྒྱལ་མཚན་པ་ཡང་ཕྱག་ཕྱིར་ཕེབས་པ་ལ་གསང་སྔགས་ལམ་རིམ། འཇིགས་བྱེད་ཀྱི་མངོན་རྟོགས། ལྷན་ཐབས་སྦྱིན་སྲེག་གི་ཆོ་ག་རྣམས་གསན། སྔགས་རིམ་ལ་མཚན་ཉིད་ལམ་རིམ་གྱི་རྒྱུད་པ་འདྲ་བ་ཞིག་ཡོད་དམ་དགོངས་ནས་འདིའི་རྒྱུད་པ་ཇི་ལྟར་ལགས་ཞུས་པས། བདག་གིས་རྗེ་རང་ལ་ཞུས་པ་ཡིན་གསུང་ནས་རྒྱས་པར་མི་གསུང་དེར་ཆོས་རྗེ་མི་ཉག་པའང་ཕེབས་བྱུང་བ་ལ། སྒྲོལ་དཀར་གྱི་ཚེ་སྒྲུབ་གསན། མི་ཉག་པ་དེ་སྐུ་སྐྱེ་བ་སྔ་མ་རྗེ་རིན་པོ་ཆེའི་སྐུ་སྐྱེ་སྔ་མའི་ཡུམ་ཡིན་པ་དེའི་རྒྱུ་མཚན་གྱིས་རྗེ་ལ་ཐུགས་ཤིན་དུ་ཉེ་བ་ཅིག་ཡོད་པར་འདུག་གསུང་། རྗེ་རིན་པོ་ཆེ་དེ་གཉལ་གྱི་མོ་ལའི་ལ་རྩར་དགོང་གཅིག་བཞུགས་པའི་དུས་སུ། རྗེ་བཙུན་བྱམས་པ་སྐུ་རི་རྒྱུད་ཙམ་གཟིགས་པའི་ཞལ་ནས། རིགས་ཀྱི་བུ་སངས་རྒྱས་འཇིག་རྟེན་དུ་བྱོན་པ་འདྲ་བ་ཅིག་འབྱུང་བར་ཤེས་པར་གྱིས་ཤིག་ཅེས་ལུང་བསྟན་པ་ལྟར་བྱུང་སྟེ་ཁོང་གསོ་སྦྱོང་མཛད་པ་ལ་ཕེབས་པའི་ཚེ་རི་ཐམས་ཅད་ཀྱང་འགུལ་ཞིང་ཡོད་པ་སྙམ་བྱུང་ལ། གསོ་སྦྱོང་གི་ལས་ལ་མི་དབང་བའི་སྐྱེ་བོ་ཐ་མལ་པའི་ཚོགས་པ་ཟད་ནས་བལྟ་བ་རྣམས་ཀྱང་དད་པ་རང་དབང་མེད་པ་སྐྱེ[A:25]བར་འདུག གསང་བའི་བདག་པོས་ལས་ཀྱི་རྡོ་རྗེ་ལ་གསུངས་པ་ན། འདིའི་ཡོན་ཏན་གྱི་མཐའ་ངེད་ཀྱིས་ཀྱང་མི་རྟོགས་གསུངས་པ་དེ་ལས་ལྷག་པའི་བསྔགས་པ་བརྗོད་རྒྱུ་མི་སྣང་ནའང་། རྗེས་སུ་འཇུག་པ་རྣམས་ཞུ་ལན་བདུད་རྩིའི་སྨན་མཆོག་ལ་དེ་ཙམ་གྱི་རྩིས་མེད། རྗེ་རིན་པོ་ཆེ་དེ་གདུལ་བྱ་ཕྱོགས་གཅིག་པ་ཚོ་ཅིག་འདུལ་དུ་བྱོན་པར་འདུག་པས། གྲུབ་པའི་མཐའ་རྣམས་ཀྱང་གདུལ་བྱའི་བསམ་པའི་དབང་གིས་འབྱུང་བ་ཡིན་ཏེ། དཔེར་ན། གནས་དེར་