[A:357a]bcas pa nyams myong yid ches su legs par nos so/ /
de yang zab lam 'di la brten nas gnas skabs kyi dngos grub ma zad mchog gi dngos grub kyang bde blag tu sgrub nus pas na/ mkhyen brtse'i zhabs kyis/ zab las ches zab gsang chen snying po'i bcud/ /dkon las ched dkon yid bzhin rin chen dbang / mchog las ches mchog snyan brgyud gdams pa 'di/ /sa skya'i rje btsun thugs kyi nying khu yin/ /'di 'dra rtse gcig bsgoms na lta ci smos/ /thos pa tsam gyis snang srid 'khor 'das chos/ /kun gyi rang mtshangs rjen par ston pa'i phyir/ /zab par rlom pa gzhan gyis do zla min/ /zhes bsngags brjod mdzad pa ni/ bla ma dang gdams ngag la sngon med pa'i mos gus gzhon nu'i dga' ba lta bus thugs gting nas tshims shing shin tu rangs pa'i gsung du mngon zhing / gzhan yang / dpe 'di rang gi bstan pa 'dzin nges las/ /gzhan gyi rna bar ming yang mi bsgrag cing/ /snying nas dad kyang bstan pa mi zin na/ /chos rgyun shod la dpe rgyun sba bar byos/ /